தெரியுமா இவரை 19 - தாதா சாகேப் பால்கே

இந்திய திரைப்படத்துறையின் தந்தையாக மதிக்கப்படுபவர், தாதா சாகேப் பால்கே என்று அழைக்கப்படும் துண்டிராஜ் கோவிந்த் பால்கே. நாசிக்  அருகே உள்ள திரும்பகேஸ்வரில் 1870-ம் ஆண்டு ஏப்ரல் 30-ம் தேதி பிறந்தார். 

ஆரம்பக் கல்வியை நாசிக்கில் பயின்ற அவர், 1885-ம் ஆண்டு மும்பையில் உள்ள சர் ஜெ.ஜெ கலைக்கல்லூரியில் சேர்ந்து படித்தார். ஓவியம், சிற்பம் ஆகிய துறைகளில் அவருக்கு ஆர்வம் இருந்தது. படிப்பை முடிந்து சரியான வேலை கிடைக்காத நிலையில், ஓவியராகவும், மேஜிக் செய்தும் பிழைப்பை நடத்தினார். 

அந்த காலக்கட்டத்தில் இந்தியாவுக்கு சினிமா அறிமுகமானது.  வெளிநாட்டில் தயாரிக்கப்பட்ட ஊமைப்படங்கள் மக்களுக்கு திரையிட்டுக் காட்டப்பட்டன. அப்போது காட்டப்பட்ட படங்கள் அனைத்தும், ஒலி இல்லாத ஊமைப்படங்களாகவே இருந்தன. படத்தின் கதையை விளக்குவதற்காக, அப்போது தியேட்டர்களில் நாடக க் கலைஞர்கள் இடையிடையே கதையை விளக்கிச் சொல்வார்கள். படத்திற்கு சுவாரஸ்யத்தைச் சேர்ப்பதற்காக இசைக் குழுவும் நேரடியாக பின்னணி இசையை வாசிப்பார்கள். 

அந்தப் படங்களைப் பார்த்த பால்கேவுக்கு சினிமா மீது ஆர்வம் பிறந்த து. இங்கிலாந்தில் உள்ள வால்டன் ஸ்டுடியோவில் சினிமாவைக் கற்றுக் கொண்டு திரும்பிய பால்கே, சொந்தமாக கேமரா வாங்கிக் கொண்டு வந்து, படம் எடுக்கும் முயற்சியில் இறங்கினார்.

தயாரிப்பு, கதை, வசனம், படத்தொகுப்பு, ஒளிப்பதிவு, இயக்கம் என சகலத்தையும் அவரே கவனித்துக் கொண்ட அவருக்கு பெரும் சவாலாக இருந்தது நடிகர்கள்தான். 

நாடகங்களில் பெண்கள் நடிப்பதே பெரும் பாவமாக கருதப்பட்ட அந்த நாளில், ஆண்களை பெண் வேடமிட்டு நடிக்க வைத்தார். மேலும், படத்தில் நடிப்பதற்கு ஆட்கள் கிடைக்காத தால், தமது குடும்பத்தைச் சேர்ந்தவர்களையே நடிக்க வைத்தார்.  தீவிர முயற்சியால் 1913-ல், ‘ராஜா அரிச்சந்திரா’ என்ற திரைப்படத்தை எடுத்தார். அதுதான், இந்தியாவின் முதல் சினிமா. மவுனப் படமான அதில் வரும் டைட்டில்கள் மராத்தியில் எழுதப்பட்டிருந்தன. அது மும்பையில் தயாரிக்கப்பட்டு, திரையிடப்பட்டது. 1940-ம் ஆண்டு வரை 70-க்கும் மேற்பட்ட படங்களை உருவாக்கிய அவர், பெரும்பாலும் அந்த திரைப்படங்களை அவரே இயக்கினார்.

பெரும் சிரமங்களுக்கு சினிமா வாழ்க்கையை நடத்திய தாதா சாகேப் பால்கே, 1944-ம் ஆண்டு பிப்ரவரி மாதம் 16-ம் தேதி தமது 73-ம் வயதில் காலமானார். அவரது நினைவாக திரைத்துறையில் சிறந்து விளங்கும் கலைஞர்களக்கு தாதா சாகேப் பால்கே விருது வழங்கப்பட்டு வருகிறது. 

தெரியுமா இவரை - 18 சாமுவேல் ஹானிமன்

ஆங்கில மருத்துவத்தில் எம்.டி. பட்டம் பெற்ற ஜெர்மன் நாட்டைச் சேர்ந்த டாக்டர். சாமுவேல் ஹானிமன் என்பவரால் கண்டுபிடிக்கப்பட்ட மருத்துவ முறையே ஹோமியோபதி மருத்துவம். ஜெர்மனியின் மிசென் நகரில் ஏழ்மையான குடும்பத்தில் ஏப்ரல் 10, 1755 – ம் ஆண்டு பிறந்தார். 

லெய்ப்சிக் பல்கலைக்கழகத்தில் மருத்துவம் பயின்று, வியன்னாவின் எர்லேங்கன் பல்கலைக்கழகத்தில் மருத்துவத்தில் முதுநிலைப் பட்டம் பெற்று, சிறந்த மருத்துவராகப் பணியாற்றினார். 

ஆங்கில மருத்துவம் மூலம் நோயாளிகளை முழுமையாக குணப்படுத்த முடியாமலும், அதற்காக உடகொள்ளும் மருந்துகள் பக்க விளைவுகளை ஏற்படுத்துவதும் அவருக்கு பெரும் சோர்வை ஏற்படுத்தின. இதனால், வெறுத்துப்போன ஹானிமன், மருத்துவத் தொழிலை விட்டு விலகி, புத்தகங்களை மொழி பெயர்க்கும் தொழிலை மேற்கொண்டார். 

வில்லியன் கலின் என்ற புகழ்பெற்ற மருத்துவரின் நூலை மொழிபெயர்க்கும்போது, சின்கோனா மரப்பட்டையின் மருத்துவ குணம் பற்றி அறிந்தார். சின்கோனா மரப் பட்டைகளில் உள்ள கசப்புத் தன்மை மலேரியா காய்ச்சலை குணமாக்கும் என்ற வாசகம் அவரது கவனத்தைக் கவர்ந்த்து.  இதுதொடர்பான ஆய்வில் இறங்கிய ஹானிமன், சின்கோனா மரப்பட்டைச் சாறைக் குடித்து தமது உடலில் காய்ச்சலை வரவழைத்துக் கொண்டார். பின்னர், அதிக வீரியம் கொண்ட அதே மரப்பட்டைச் சாறைக் குடித்து காய்ச்சலை குணமாக்கிக் கொண்டார். தொடர்ந்த ஆய்வுகள் மூலம், ‘எது ஒன்றை உருவாக்கும் தன்மை உடையதோ அது தான் அழிக்கும் ஆற்றல் கொண்டது’. இதனைக் கொண்டு ‘லைகாஸ்கேர்லைகாஸ்’ என்ற தத்துவத்தினை உருவாக்கினார். 

விஷத்தன்மை கொண்ட மருந்துகளை தண்ணீர் ஆல்கஹால் போன்றவற்றில் நீர்த்துப்போக செய்து ஆய்வு செய்தபோது முன்பைவிட அதிக அளவில் அறிகுறிகள் கிடைத்தது. இவ்வாறு நீர்த்துப் போகும் நுட்பமான அளவுகளின் வீரியமூட்டும் முறையையும் கண்டறிந்தார். இதன் அடிப்படையில் 1796-ம் ஆண்டு ‘ஓமியோபதி’ என்ற மருத்துவ முறையை உலகிற்கு அறிமுகப்படுத்தினார்.

ஒத்தநோய் அறிகுறிகளை ஒத்த மருந்துகளால் (முள்ளை முள்ளால் எடுப்பது) இயற்கையான முறையில் நோய்களை குணப்படுத்துவது இம்மருத்துவ முறையின் அடிப்படைத் தத்துவமாகும். பக்க விளைவுகளோ, பத்தியமோ இல்லாத இந்த மருத்துவமுறையில், நோயின் தன்மைக்கேற்ப உணவுக் கட்டுப்பாடுகள் உண்டு. 

1807-ல் எழுதிய நூலில் தன் மருத்துவ முறையைக் குறிப்பிட ‘ஹோமியோபதி’ என்ற சொல்லைப் பயன்படுத்தினார். பின்னர், அவர் உருவாக்கிய மருத்துவமுறை ஹோமியோபதி மருத்துவமுறை என்று அழைக்கப்பட்டது. தனி மனிதனாக சுமார் பாடுபட்டு, ‘ஹோமியோபதி’ என்ற புதிய மருத்துவ முறையை உலகுக்கு வழங்கிய சாமுவேல் ஹானிமன் 88-வது வயதில் 1843-ம் ஆண்டு மறைந்தார். இவரது பிறந்த தினம் சர்வதேச ஹோமியோபதி மருத்துவ தினமாக கடைபிடிக்கப்படுகிறது. 

தெரியுமா இவரை – 17 சார்லி சாப்ளின்

ஹாலிவுட்டின் தன்னிகரற்ற கலைஞரும், உலகுக்கே நம்பிக்கையையும் நகைச்சுவையையும் வாரிவழங்கியவரு மான சார்லி சாப்ளின் லண்டனில் உள்ள வால்வோர்த் என்ற இடத்தில் ஏப்ரல் 16, 1889-ம் ஆண்டு பிறந்தார்.  

பெற்றோர் இசை அரங்குகளில் பொழுது போக்கு நிகழ்ச்சிகளை நடத்தி வந்தனர். குடிப்பழக்கத்தால் சீரழிந்த தந்தை குடும்பத்தை விட்டுப் பிரிந்து போக, தாய் மனநல பாதிப்புக்கு ஆளானார். எனவே, பிழைப்புக்காக 5 வயதிலேயே மேடையேறினார். அவரது தயார் கடைசியாக ஏறிய மேடையே, அவருக்கு முதல் மேடையாகவும் அமைந்தது. 12-வது தந்தை இறந்த போக, தாயார் நிரந்தரமாக மனநலம் பாதிக்கப்பட்டார். 

சகோதரருடன் அனாதை இல்லத்தில் வளர்ந்தார் சாப்ளின்.  14 வயதில் மேடை நாடகங்கள் மூலம் அவரது கலையுலகப் பயணம் தொடங்கியது.

அகதியாக  கார்னோ என்ற நாடக குழுவுடன் அக்டோபர் 2, 1912- அன்று அமெரிக்கா சென்றார். நாடகங்களில் நடித்தபடியே சினிமா வாய்ப்புத் தேடிய அவர், கீ ஸ்டோன் சினிமா நிறுவனத்தில் சேர்ந்தார். அவர் நடித்த 

முதல்  மவுனத் திரைப்படம் ‘மேக்கிங் ஏ லிவிங்’ 1914-ம் ஆண்டு வெளியானது.

 ‘கிட் ஆட்டோ ரேசஸ்’ என்ற இரண்டாவது படத்தில் தொள தொள கால் சட்டை, சிறிய கோட்டு, ஹிட்லர் மீசை, சின்னத் தொப்பி, சிறு தடி’ என்ற இந்த கெட்டப்பில் தோன்றிய கோமாளி கனவான் வேடத்தைப் பார்த்து உலகமே விழுந்து விழுந்து சிரித்தது. பரிதாபத்தையும், சிரிப்பையும் ஒன்றாக வரச்செய்யும்  இந்த தோற்றமே அவரது நிரந்தர அடையாளமாகவும் மாறிப்போனது. அதன் பின்னர் அவரது கலையுலக வாழ்க்கை ஏறுமுகமாகவே இருந்த்து. ஒரே ஆண்டில் 35 திரைப்படங்களில் நடிக்கும் அளவுக்கு பிசியான நடிகரானார். 

அவர் நடித்த அத்தனைப் படங்களும் சாதனைகள் படைத்தன. ஸ்லாப்ஸ்டிக் காமெடி எனப்படும் உடல் மொழி மற்றும் பாவனைகளால் உலக மக்களை குலுங்கிக் குலுங்கி சிரிக்க வைத்தார்.

வெறும் நடிப்புடன் நிறுத்திக்கொள்ளாமல், கதை, வசனம், இயக்கம், இசை, படத்தொகுப்பு நடனம், தயாரிப்பு என திரையுலகில் அத்தனை துறைகளிலும் கோலோச்சினார் சாப்ளின். அவரது படங்கள் நகைச்சுவை 

தோரணங்களாக இல்லாமல் ஏழைகளின் பரிதாப வாழ்க்கையும்,  முதலாளிகளின் பேராசையையும் விமர்சித்தன. பொங்கி பிரவாகமெடுக்கும் சிரிப்பும், மெலிதாக இழையோடும் சோகமும் கொண்ட அற்புத காவியங்கள் அவரது படங்கள்.

இரண்டு முறை ஆஸ்கர் சிறப்பு விருதுகளை வென்ற சாப்ளினுக்கு  இங்கிலாந்து அரசு 1985-ம் ஆண்டு அஞ்சல் தலைவெளிட்டு கௌரவித்த்து. தனித்துவமான நகைச்சுவையால் உலகையே கட்டிப்போட்ட சார்லி சாப்ளினின் தனிப்பட்ட வாழ்க்கை சோகங்களால் சூழப்பட்டது.

“நான் மழையில் நனைய ஆசைப்படுகிறேன், நான் அழுவது உலகுக்கு அப்பொழுதுதான் தெரியாது!” என்பது சார்லி சாப்ளின் உதிர்த்த புகழ்பெற்ற வாசகம்.

நான்கு முறை திருமணம் செய்த சாப்ளினுக்கு முதல் மூன்று திருமணங்கள் தோல்வியில் முடிந்தன. தமது 29-வது வயதில், 17 வயதான நடிகை மில்ட்ரெட் திருமணம் செய்த சாப்ளினுக்கு இரண்டே ஆண்டுகளில் மணமுறிவு ஏற்பட்டது. அவர்களுக்கு பிறந்த குழந்தையும் 3 நாட்களில் இறந்தது.

பின்னர், 16 வயது நடிகை லிடா கிரேவை இரண்டாவது மனைவியாக ஏற்றுக்கொண்டபோது சாப்ளினுக்கு வயது 35. இந்த திருமணமும் தோல்வியில் முடிந்த்து. 2 குழந்தைகள் பிறந்த பிறகு, லிடா கிரேக்கும் சாப்ளினுக்கும் ஒத்துப் போகவில்லை. குழந்தைகளுடன் பிரிந்து சென்ற லிடா கிரே, பின்னர் சட்டப்பூர்வமாக விவகாரத்து பெற்றார்.

பின்னர், 21 வயது பவுலட் கோர்ட் என்கிற நடிகையுடன் நெருக்க மாகப் பழகிய சாப்ளின், அவரை திருமணம் செய்து கொண்டார்.  அப்போது சாப்ளி னுக்கு வயது 43. இந்த வாழ்க்கையும் அவருக்கு மகிழ்ச்சியைத் தரவில்லை. 

நடிக்க வாய்ப்பு கேட்டு வந்த 16 வயது ஊனா ஓநில் என்கிற பெண்ணை சாப்ளின் 4-வது திருமணம் செய்துகொண்டார். அப்போது அவருக்கு வயது 54. சாப்ளின் கடைசிவரை ஒற்றுமையாக வாழ்ந்த ஓநிலைப் பற்றி தன் சுயசரிதையில் ‘அவருடன் ஏற்பட்டது மட்டுமே மிகச் சரியான காதல்’ என்று குறிப்பிட்டுள்ளார். இந்தத் தம்பதி 8 குழந்தைகளைப் பெற்றெடுத்தார்கள்.

1952-ல் அமெரிக்காவைவிட்டு வெளியேறிய சாப்ளின், சுவிட்சர்லாந்தில் குடியேறினார். 1972-ல் வாழ்நாள் சாதனையாளருக்கான ஆஸ்கர் விருதைப் பெற்றுக்கொள்ள அகாடமி அழைத்தது. தயக்கத்துக்குப் பிறகு அழைப்பை ஏற்று அமெரிக்கா வந்த சாப்ளினுக்கு அரங்கில் அத்தனை பேரும் எழுந்து நின்று இடைவிடாமல் 12 நிமிடங்கள் கை தட்டினார்கள். இது ஆஸ்கர் விருது விழா வரலாற்றில் மிகவும் நீளமான கை தட்டலாகும்.

சாப்ளின் 1977-ம் ஆண்டு கிறிஸ்துமஸ் தினத்தன்று தனது 88-வது வயதில் இறந்தார். இவரது உடலை வாட் நகரில் உள்ள கார்சியர்-சுர்-வெவே கல்லறையில் அடக்கம் செய்தார்கள். ஆனால், அங்கும் அவரால் நிம்மதியாக உறங்க முடியவில்லை.

மார்ச் 1, 1978-ம் ஆண்டு இவரது உறவினர்களிடமிருந்து பணம் பறிப்பதற்காக இவரது உடல் கல்லறையிலிருந்து திருடப்பட்டது. ஆனால் இத்திட்டம் தோல்வியுற்று, திருடர்கள் பிடிபட்டனர். பதினொரு வாரங்களுக்குப் பின் ஜெனீவா ஆற்றின் அருகில் சாப்ளினின் உடலைக் கைப்பற்றினார்கள்.

தெரியுமா இவரை - 16 ஆபிரகாம் லிங்கன்

  அடிமைத்தனத்தையும் இனவெறியையும் ஒழித்து, ஒடுக்கப்பட்ட மக்களின் தலைவராக திகழ்ந்தவர் அமெரிக்க முன்னாள் குடியரசுத் தலைவர் ஆபிரகாம் லிங்கன். அமெரிக்காவின் கென்டகி மாகாணத்தில் ஹார்டின் என்ற கிராமத்தில் ஏழைக் குடும்பத்தில் 12.02.1809 – ம் தேதி பிறந்தார். தந்தை தாமஸ், தாய் நான்சி. தந்தை செருப்பு தைக்கும் கூலித் தொழிலாளி. தமது 9-வது வயதிலேயே லிங்கன் தாயை இழந்தார்.

   ஊர் ஊராகச் சென்று பாடம் சொல்லித் தரும் ஆசிரியர் ஒருவரிடம் மூன்று வாரங்கள் ஆரம்பக் கல்வி பயின்ற லிங்கன் பள்ளியில் படித்தது சுமார் ஒரு வருடம் மட்டுமே. குழந்தைப் பருவத்தில் இருந்தே அப்பாவின் அனைத்து வேலைகளிலும் அவருக்கு உதவியாக இருந்து வந்தார்.

  நியு ஆர்லியன்சில் அவர்கள் குடும்பம் வசித்தபோது, கறுப்பினத்தவர்கள் விலைக்கு வாங்கப்படுவதையும் இரும்புக் கம்பிகளால் கட்டப்படுவதையும், சாட்டையால் அடித்து கொடுமைப் படுத்தப்படுவதையும் கண்டு வருந்தினார். .

   இந்தக் கொடுமைகளை எப்படியாவது ஒழிக்க வேண்டும் என்று உறுதிபூண்டபோது இவருக்கு வயது 15. சுயமாக கல்வி பயின்ற அவர், சட்டப்படிப்பு படித்த அவர்,. சிறிது காலம் வழக்கறிஞராகவும் பணியாற்றினார். 1830-ல் குடும்பம் இல்லினாய்சுக்குக் குடியேறியது. பேச்சாற்றலில் வல்லவரான லிங்கன், அரசியலிலும் ஆர்வத்துடன் பங்கேற்றார்.

   ‘வீக்’ என்கிற கட்சியில் சேர்ந்து இல்லினாய்ஸ் மக்கள் பிரதிநிதி சபைக்கு 1834-ல் தேர்ந்தெடுக்கப்பட்டார். நான்கு முறை தொடர்ந்து தேர்ந்தெடுக்கப்பட்டு எட்டு ஆண்டுகாலம் அந்த பதவியை வகித்தார். பின்னர், அமெரிக்காவின் குடியரசு கட்சியில் சேர்ந்து 1858-ல் அந்த கட்சியின் சார்பில் அமெரிக்க நாட்டு செனட் பதவிக்கு போட்டியிட்டு எதிர்பாராத விதமாக தோல்வியை தழுவினார்.

    பிறகு, 1860-ம் ஆண்டு குடியரசு கட்சியின் வேட்பாளராக அமெரிக்க அதிபர் தேர்தலுக்கு போட்டியிட்டு வெற்றிப் பெற்று நாட்டின் 16-வது அதிபராக தேர்ந்தெடுக்கப்பட்டார்.

   அரசியலில் நுழைந்த து முதல் கருப்பின மக்களின் அடிமைத்தனம் ஒழிய பாடுபடுவதையே லட்சியமாக கொண்டிருந்த லிங்கன், அடிமைகளை நிரந்தரமாக விடுவிப்பதற்கான விடுதலைப் பிரகடனத்தை 1863-ல் வெளியிட்டார். இதற்கு ஆதரவும், எதிர்ப்பு உருவானதால், அது உள்நாட்டு போர் வரை சென்றது. அதை முடிவுக்குக் கொண்டு வந்த லிங்கன், 1864-ம் ஆண்டு மீண்டும் அதிபராக தேர்ந்தெடுக்கப்பட்டார்

      1865-ம் ஆண்டு ஏப்ரல் மாதம் 14-ந்தேதி புனித வெள்ளி அன்று,  ‘அவர் அமெரிக்கன் கசின்’ என்கிற நகைச்சுவை நாடகத்தைக் காண தமது மனைவியுடன் சென்ற லிங்கன் துப்பாக்கியால் சுடப்பட்டார். பின்னர், ஏப்ரல் 15-ம் தேதி அவர் மரணமடைந்தார். அப்போது அவருக்கு வயது 56.  

ஏப்ரல் 1-ம் தேதி ஏன் முட்டாள்கள் தினமாக கடைபிடிக்கப்படுகிறது?

அன்னையர் தினம், தந்தையர் தினம், காதலர் தினம், மகளிர் தினம் போன்று ஏப்ரல் 1-ம் தேதி முட்டாள்களுக்காக ஒதுக்கப்பட்டுள்ள தினம். கனடா, நியூசிலாந்து, லண்டன், ஆஸ்திரேலியா, தென் ஆப்ரிக்கா போன்ற நாடுகளில் பாரம்பரிய விழாக்கள் போல் இந்த நாள் கொண்டாடப்ப டுகிறது. 

எதற்காக இந்த தினம் கொண்டாடப்படுகிறது என்பதற்கான உறுதியான காரணங்கள் தெரியவில்லை. வரலாற்று ரீதியாகவும், கற்பனையாகவும் பல்வேறு காரணங்கள் கூறப்படுகின்றன. 

பிரான்ஸ் நாட்டில்தான்  முதன் முதலில் முட்டாள்கள் தினம் கொண்டாடப்பட்டது.  16-ம் நுாற்றாண்டு வரை ஐரோப்பாவின் பல நாடுகளில், அப்போதைய ஜூலியன் காலண்டரின்படி, ஏப்ரல் 1-ம் தேதிதான்  புத்தாண்டு தினமாக கடைபிடிக்கப்பட்டது. பின்னர், 13-ம் கிரிகோரி என்ற போப் ஆண்டவர், 1582 பிப்., 29-ல், புதிய காலண்டரை அறிமுகப்படுத்தினார்.அதில் ஜனவரி 1-ம் தேதி புத்தாண்டாக மாற்றப்பட்டது. 

ஆனால், ஜெர்மனி உள்ளிட்ட பல நாடுகள் இந்த மாற்றத்தை உடனடியாக ஏற்கவில்லை. ஸ்பெயின், போர்ச்சுக்கல், இத்தாலி போன்றவை இந்த காலண்டரை 1582-ம் ஆணடு அக்டோபர் மாதம்  முதல் பயன்படுத்த தொடங்கின. 1752-ம் ஆண்டு இங்கிலாந்து, அமெரிக்காவிலும் மற்றும் ஆங்கிலேயர் ஆட்சியின் போது இந்தியாவிலும் இக்காலண்டர் புழக்கத்திற்கு வந்தது. புதிய காலண்டரை ஏற்காமல், ஏப்ரல் 1-ம் தேதியையே புத்தாண்டு தினமாக கொண்டாடி வந்தவர்களை கேலி செய்யும் விதமாக ‘முட்டாள் தினம்’ உருவாக்கப்பட்டது. நாளடைவில் அனைத்து நாடுகளும் ஏப்ரல் 1- ம் தேதியை  முட்டாள்கள் தினமாக கடைபிடிக்கத் தொடங்கின. 

1508-ம் ஆண்டு முதலே பிரான்சில் முட்டாள்கள் தினம் கொண்டாடப்பட்டு வந்ததாகவும், 1539-ம் ஆண்டிலேயே டச்சு மொழியில் இத்தினம் பற்றி குறிப்பிடப்பட்டு இருந்ததென்றும், சில குறிப்புகள் தெரிவிக்கின்றன. 

பிரான்ஸ் நாட்டில்,  ஓடைகள் மற்றும் ஆறுகளில் ஏப்ரல் மாதத்தில் நிறைய மீன்கள் கிடைக்கும். அதனை எளிதாக சிக்கிக் கொள்ளும் அந்த மீன்களை முட்டாள் மீன்கள் என அழைக்கப்பட்டன. இது பின்னர், இந்த ஏப்ரல் மாத தொடக்கத்தில், பிரான்ஸ் நாட்டு மக்கள் தங்களுக்குள் ஏமாற்றி விளையாடத் தொடங்கினர். அதுவே ஏப்ரல் 1-ம் தேதி முட்டாள் தினமாக மாறுவதற்கு காரணம் என்போரும் உண்டு. 

1466-ம் ஆண்டு, பிலிப்பைன்ஸ் நாட்டு அரசனை  அவரது அவைக் கவிஞர் முட்டாளாக்கிய தினம் இது என்றும் அதனால், அந்த நாள் முட்டாள்கள் தினமாக மாறியதாகவும் ஒரு ஒருகதை உண்டு. 

ஆங்கில கவிஞர் ஜெஃப்ரி, 14 ஆம் நூற்றாண்டில் எழுதிய சேவல் நரி கதைதான் ஏப்ரல் 1-ம் தேதி முட்டாள்கள் தினமாக கடைபிடிக்கப்படுவதற்கு மூல காரணம் என மற்றொரு கதையும் உண்டு.  

நரியிடம் சிக்கிய சேவல் ஒன்று, பொய் சொல்லி, அதனிடமிருந்து தப்பும் என இருக்கும் அந்த கதையில், 'Syn March began' என்று ஒரு குறிப்பு இடம் பெற்றிருக்கும். இதனை மார்ச் மாதம் தொடங்கியதிலிருந்து 32 வது நாள் என்பதாக புரிந்துக் கொண்டு, ஏப்ரல் 1-ம் தேதியைதான் அவர் குறிப்பிட்டார் என்றனர். இதனால்தான் ஏப்ரல்-1 ஆம் தேதி முட்டாள் தினமாக கடைபிடிக்கப்படுகிறது என்போரும் உண்டு. 

ஏமாற்றங்கள் பெரும்பாலும் எதிர்பார்ப்புக்களாலேயே ஏற்படுகிறது. எல்லோர் வாழ்க்கையில் ஏமாற்றாமல் வருவது ஏமாற்றம் மட்டுமே. ஏமாற்றத்தை தவிர்க்க எச்சரிக்கையுடன் இருக்க வேண்டும் என்று உணர்த்துவற்காக இந்த நாள் கடைபிடிக்கப்படுவதாக எடுத்துக்கொள்ளலாம். 

x

தெரியுமா இவரை - 15 டாக்டர் அம்பேத்கார்

நீங்கள் என்னுடைய வாழ்க்கையில் இருந்து கற்றுக் கொள்வதற்கு ஒரு பாடம் இருக்கிறது என்றால், அது என்னுடைய சமூகத்தை நான் ஒருபோதும் கைவிட்டதில்லை என்பதுதான். என்னுடைய வாழ்நாள் முழுவதும் அவர்களுடைய மகிழ்விலும், துயரத்திலும் பங்கேற்பதில் நான் பெருமை கொள்கிறேன்.''

- டாக்டர் அம்பேத்கர்

"இந்திய அரசியல் சட்டத்தின் தந்தை" என்று போற்றப்படும் டாக்டர் பி.ஆர்.அம்பேத்கார், மராட்டிய மாநிலம் ரத்தினகிரி மாவட்டம் அம்பாவாடே என்ற கிராமத்தில் 14.04.1891 நாள் பிறந்தார். தந்தை ராமாஜி மாலோஜி. தாய் பீமாபாய். ஏழைக் குடும்பமான இவர்களுக்கு 14 குழந்தைகள். கடைசிப் பிள்ளைதான் அம்பேத்கார். பெற்றோர் அவருக்கு வைத்த பெயர் பீமாராவ் ராம்ஜி. 

மகார் என்ற தாழ்த்தப்பட்ட இனத்தைச் சேர்ந்த அம்பேத்கார் கல்வி நிலையங்களில் அனுபவித்த கொடுமைகள் ஏராளம். உயர்ந்த சாதிப்பிள்ளைகளும், ஆசிரியர்களும் பள்ளி நிர்வாகமும் தாழ்ந்த சாதிப்பிள்ளைகளைக் கேவலமாக நடத்தினர். தாழ்ந்த சாதிப்பிள்ளைகள், உயர் சாதிப்பிள்ளைகளுடன் சேர்ந்து உட்காரக்கூடாது, உயர்சாதிப் பிள்ளைகளுடன் பேசக்கூடாது, தொடக்கூடாது என்று ஒதுக்கி வைத்தனர்.

இந்த அவமானத்தையெல்லாம் தாங்கிக்கொண்டு படிக்க வேண்டுமா என்றுகூட அம்பேத்கார் நினைத்தது உண்டு. ஆனால், அதே பள்ளியில் பணியாற்றிய அம்பேத்கார் என்ற அந்தண ஆசிரியர் ஒருவரின் அன்பும் அரவணைப்பும் அவர் எண்ணத்தை மாற்றின. தாழ்த்தப்பட்டவர்களும் மனிதர்களே. அவர்களையும் சமமாக மதித்து நடத்த வேண்டும் என்ற உயரிய கொள்கையுடைய அந்த ஆசிரியர், அம்பேத்கார் படித்து முன்னேற எல்லா உதவிகளையும் செய்தார். அவருடைய அன்புக்கு அடிமையான அம்பேத்கார், பீமாராவ் ராம்ஜி என்ற தன் பெயரை "அம்பேத்கார்" என்று மாற்றிக்கொண்டார். அன்று முதல் அவர் பெயர் பீமாராவ் ராம்ஜி அம்பேத்கார் (பி.ஆர்.அம்பேத்கார்) என்று வழங்கப்படுகிறது.

14-வது வயதில் மெட்ரிகுலேஷன் படித்துத் தேறியதும், அம்பேத்காருக்கு அவர் தந்தை திருமணம் செய்து வைத்தார். மனைவி பெயர் ராமாபாய். பிறகு பம்பாய் கல்லூரியில் இண்டர் மீடியட் படித்து முடித்தார். அடுத்து பரோடா மன்னரின் உதவி பெற்று "பி.ஏ." படித்துப் பட்டம் பெற்றார். பின்னர் பரோடா அரசின் படையில் சேர்ந்து பணியாற்றினார். அங்கும் மற்றவர்களால் தொல்லை. இடையில் தந்தை காலமாகி விடவே, வேலையை விட்டுவிட்டு பம்பாய் திரும்பினார்.

மேலும் படிக்க விரும்பிய அம்பேர்காருக்கு வீட்டு பொருளாதாரச் சூழல் இடம் கொடுக்கவில்லை. மீண்டும் பரோடா மன்னரின் உதவி பெற்று 1913-ம் ஆண்டு அமெரிக்கா சென்று கொலம்பியா பல்கலைக் கழகத்தில் படித்து எம்.ஏ. பட்டம் பெற்றார்.

பின்னர், பல சிரமங்களுக்கு இடையே லண்டன் சென்று படித்து, "எம்.எஸ்சி" பட்டம் பெற்று பம்பாய் திரும்பினார். மேலும் படித்து "பாரிஸ்டர்" பட்டம் பெற்று வக்கீல் தொழிலில் ஈடுபட்டார். தாழ்த்தப்பட்டவர்களின் நலனுக்காக ஒரு சங்கத்தை நிறுவி, அவர்களின் நலனுக்காக பாடுபட்டார். அவருடைய சேவையைப் பாராட்டி பம்பாய் மாகாண கவர்னர், பம்பாய் மேல்_சபை உறுப்பினர் பதவியை அம்பேத்காருக்கு அளித்தார்.

மாகாத்து என்ற நகரில் பொதுக்குளத்தில் தாழ்த்தப்பட்டவர்கள் நீர் எடுக்கக்கூடாது என்று கட்டுப்பாடு இருந்தது. அம்பேத்கார் அங்கு சென்று, இதைக் கண்டித்துப் பேசினார். அவரே குளத்தில் இறங்கி நீர் அருந்தினார். தாழ்த்தப்பட்ட மற்றவர்களும் நீர் அருந்தினர். பெரும் மோதல் ஏற்பட்டு, பிரச்சினை நீதிமன்றத்துக்குச் சென்றது. நீதிமன்றமும், எல்லா மக்களும் குளத்தில் நீர் எடுக்கலாம் என்று தீர்ப்பு வழங்கியது. 

அம்பேத்காரின் மனைவி ராமாபாய் 27.05.1935 அன்று காலமானார். 

"சுதந்திர தொழிலாளர் கட்சி" என்ற கட்சியை தொடங்கி, தாழ்த்தப்பட்ட மக்களுக்காக போராடினார் அம்பேத்கார். அவரது முயற்சியால், பல மாநிலங்களில் தாழ்த்தப்பட்ட மக்களுக்கு சம உரிமை கிடைத்தது.

உயர்ந்த சாதியினரை உறுப்பினர்களாகக் கொண்டு இருந்த வைசிராய் நிர்வாக சபையில், அம்பேத்காரின் சேவையைப் பாராட்டி அவரும் ஒரு உறுப்பினராக நியமிக்கப்பட்டார். அத்துடன் தொழிலாளர் அமைச்சராகவும் நியமிக்கப்பட்டு 3 ஆண்டுகள் பதவி வகித்தார். 

1946-ம் ஆண்டு டிசம்பர் 9-ம் தேதி, ராஜேந்திர பிரசாத் தலைமையில் அரசியல் நிர்ணயசபை செயல்படத் தொடங்கியது. அதில், சட்டம் இயற்றும் குழுவில் அம்பேத்காரும் நியமிக்கப்பட்டார். இந்தக் குழுவினர் இயற்றியதுதான் இந்திய அரசியல் சட்டம்.

சுதந்திர இந்தியாவின் பிரதமராக நேரு பொறுப்பு ஏற்றதும், அவரது அமைச்சரவையில்  அம்பேத்கார் சட்ட அமைச்சராக பொறுப்பேற்றார்.  அரசியல் நிர்ணய சபையின் 3-வது கூட்டத்தில், தீண்டாமையை ஒழிக்க சட்டம் கொண்டு வந்து நிறைவேற்றப்பட்டது. இதன் மூலம் அம்பேத்காரின் நீண்ட கால முயற்சி வெற்றி பெற்றது.

அம்பேத்கார், உடல் நலம் குன்றி பம்பாய் மருத்துவமனையில் சிகிச்சை பெற்றார். பின்னர், மருத்துவமனையில் அவரை கவனித்துக் கொண்ட சாரதா என்ற டாக்டரை மறுமணம் புரிந்து கொண்டார். இதன் மூலம் பிராமண வகுப்பைச் சேர்ந்த சாரதா அம்மையார், கலப்புத் திருமணத்திற்கு ஒரு முன்னோடியாகத் திகழ்ந்தார்.

இந்து மதத்தின் மீது சலிப்பு அடைந்த அம்பேத்கார், 1956 அக்டோபர் மாதம் இந்து மதத்தை விட்டு, மனைவி சாரதா அம்மையாருடன் புத்த மதத்தைத் தழுவினார். 

தாழ்த்தப்பட்ட மக்களுக்காக தன் வாழ்நாளையே அர்ப்பணித்த டாக்டர் அம்பேத்கார் 1956 டிசம்பர் 6-ம் தேதி காலமானார். 1990-ம் ஆண்டு இந்தியாவின் உயர்ந்த விருதான "பாரத ரத்னா" விருது அவருக்கு வழங்கப்பட்டது.

தெரியுமா இவரை - 14 ஹோசிமின்

பிரான்ஸ் நாட்டிடமும், பின்னர் ஜப்பானிடமும் அடிமைப்பட்டுக் கிடந்த வியட்நாமை அடிமைத் தளையிலிருந்து போராடி விடுவித்த மகத்தான தலைவர் ஹோசிமின். 

1890-ம் ஆண்டு பெற்றோருக்கு மூன்றாவது குழந்தையாப் பிறந்தார். அவரது இயற்பெயர்  சிங்சுங். ஹோசிமின்' என்ற பெயருக்கு 'ஒளி தந்தவர்' என்பது பொருள். இருண்டு கிடந்த வியட்நாம் நாட்டுக்கு ஒளி ஏற்றியவர் என்பதால், மக்கள் ஆசையுடன் வைத்த பெயர் ஹோசிமின்.!

பிரான்ஸ் நாடு தனக்கு தோதானவர்களை வியட்நாம் அரசின் பதவியில் அமர வைத்து,  பொம்மலாட்ட அரசியல் நடத்திக் கொண்டிருந்த காலம். அதை எதிர்த்து புரட்சியாளர்கள் போராடிக் கொண்டிருந்தார்கள். அரசுக்கு எதிரான தாக்குதல்களை நடத்திக் கொண்டிருந்த கொரில்லா படைக்கு தகவல்களை கொண்டு போகும் ஆபத்தான வேலையை சிறுவனா இருந்த ஹோசிமின் செய்துகொண்டிருந்தார். நாட்டு விடுதலைக்காக ஏதாவது செய்ய வேண்டும் என்ற உந்துதலே அதற்குக் காரணம். 

இளைஞனாக வளர்ந்ததும் பிரான்ஸ் நாட்டுக்கு எதிரான பல போராட்டங்களில் அவர் கலந்துகொண்டார். எனினும், அந்த போராட்டங்களுக்கு எந்த பலனும் கிட்டாததால் சோர்வு ஏற்பட்டதுதான் மிச்சம். பின்னர், பிரான்ஸ் நாட்டில் தபால் அலுவலகத்தில் அவருக்கு வேலை கிடைக்க, அங்கு பணியில் சேர்ந்தார். 

அவர் அந்த வேலையில் சேர முக்கியக் காரணம், பிரெஞ்சு புரட்சி எப்படி நடைபெற்றது, அதை எப்படி அவர்கள் சாதித்தார்கள் என்பதை தெரிந்துக் கொள்வதற்காகத்தான். விரும்பியபடியே, அந்த புரட்சி குறித்த தகவல்களை சேகா¤த்துக் கொண்டபின், அவர் 1940-ம் ஆண்டு அவர் வியட்நாமுக்குத் திரும்பினார். 

அந்த காலக்கட்டத்தில், பிரான்சிடமிருந்த வியட்நாம், ஜப்பானின் கைகளுக்குப் போனது. பிரான்ஸ், ஜப்பான் ஆகிய இரண்டு கொள்ளிகளில், ஜப்பான் அவர்களுக்கும் தேவலாம் என்று பட்டது. எனவே, ஜப்பானியர்களுக்கு வியட்நாம்வாசிகள் வரவேற்பும் அளித்தார்களாம். 

யாரிடம் அடிமைப்பட்டிருந்தால் என்ன, அடிமை, அடிமைதானே? எனவே, ஜப்பானியர்களையும் விரட்டியடித்து சுதந்திரத்தை நாம் சுவாசிக்க வேண்டும் என்று ஹோசிமின் முழங்கினார். அவரை நசுக்க ஜப்பான் அரசு முயற்சி செய்ய, வியட்நாமின் அடர்ந்த காடுகளுக்குள் தஞ்சமடைந்தார் ஹோசிமின். 

அந்த காட்டிற்குள் இருந்தபடியே, கொரில்லாப் படையை உருவாக்கி, வாய்ப்புக்காக காத்திருந்தார் அவர். அந்த வாய்ப்பு அவருக்கு சரியாக அமைந்தது. 1945-ம் ஆண்டு ஜப்பான் மீது அணுகுண்டுகள் வீசப்பட்டிருந்த காலம். அந்த பேரழிவின் அதிர்ச்சிலிருந்து ஜப்பான் சுதாரிக்க முடியாத நிலையில் இருக்க, அந்த வாய்ப்பை பயன்படுத்தி ஜப்பானிடமிருந்து வியட்நாமை அபகரிக்க காய்களை நகர்த்தியது பிரான்ஸ். 

ஆனால், அந்த வாய்ப்பை பிரான்ஸ் நாட்டுக்கு அளிக்காமல், முந்திக்கொண்ட ஹோசிமின், ஜப்பானியர்களை விரட்டியடித்துவிட்டு வியட்நாமை கைப்பற்றினார். அதே வேகத்துடன் வியட்நாமை சுதந்திர நாடாகவும் பிரகடனப்படுத்தினார். 

உடனுக்குடன் தேர்தலையும் நடத்த, ஹோசிமின் கட்சி அமோக வெற்றி பெற்று ஆட்சியைப் பிடித்தது. அந்நாட்டின் தலைவராக அவர் தேர்ந்தெடுக்கப்பட்டார். அடிபட்ட நாகமாக இருந்த பிரான்ஸ், வியட்நாம் மீது போர் தொடுத்தது. 

யுத்தம் ஆரம்பமானது. போர்க்கப்பல்கள், விமானங்கள், பீரங்கிகள் என சகல நவீன ஆயுதங்களுடன் வந்த பிரான்சை, குறைந்த ஆயுதங்களுடன் இருந்த வியட்நாம் ¬தா¤யமாக எதிர்கொண்டது. எப்படியும் நாம்தான் ஜெயிப்போம் என்ற அகங்காரத்தில் பிரான்ஸ் படைகள், கொஞ்சம் அலட்சியத்துடன் போரிட, காட்டுக்குள் கடுமையான கொரில்லா போர்முறையை பயின்ற வியட்நாம் வீரர்கள் அசுர வேகத்துடன் போராட்டார்கள். வாழ்வா, சாவா பிரச்னை அவர்களுக்கு. முடிவில் வியட்நாம் வீரர்களே வெற்றி பெற்றார்கள். 

வியட்நாம் வெற்றியை ஈட்டினாலும், தெற்கு வியட்நாம் பிரான்ஸ் நாட்டின் கட்டுப்பாட்டில்தான் இருந்தது. வடக்குப் பகுதி மட்டும்தான் ஹோசிமின் வசம். நாட்டை முழுமையா மீட்டே தீருவன் என சபதமிட்டார் ஹோசிமின். 

ஹோசிமின் ஒரு கம்யூனிஸ்ட் என்று முத்திரைக் குத்தி, அமொ¤க்காவிடம் உதவி கேட்டது பிரான்ஸ். கம்யூனிஸ்ட்களை எட்டிக்காயாக பார்க்கும் அமொ¤க்கா, பிரான்ஸ் நாட்டுக்கு ஆயுத உதவி செய்தது. 

பின்னர், அமொ¤க்காவின் உபயத்தால், வியட்நாமில் ஆயுத மழை பொழியத் தொடங்கியது. ஆனால், தளராமல் பிரான்ஸ் நாட்டுக்கு தண்ணிக் காட்டினார் ஹோசிமின். வெறுத்துப்போன அமொ¤க்கா, 1965-ம் ஆண்டு நேரடியாக களமிறங்கியது. இரக்கமே இல்லாமல் வடக்கு வியட்நாம் மேல் குண்டு மழை பொழியத் தொடங்கியது அமெரிக்கா. ஆனால், கொரில்லா படையில் நிபுணத்துவம் பெற்ற வியட்நாம் வீரர்கள் முன்னால் எந்த ஆயுதமும் எடுபடவில்லை. வேறு வழியின்றி வியட்நாம் முன்னால் மண்டியிட்டது அமொ¤க்கா. வடக்கு வியட்நாமை நீங்களே வைத்துக்கொள்ளுங்கள் என்று ஹோசிமினுடன் சமாதானத்துக்கு வந்தது அமெரிக்கா. 

அதை ஏற்காத ஹோசிமின், சுதந்திர நாடே எனது லட்சியம் என்பதில் உறுதியாக இருந்தார். 

1968ம் ஆண்டு ஜனவரி 1-ம் தேதி தெற்கு வியட்நாம்ல முகாமிட்டிருந்த அமெரிக்கப் படைகள், புத்தாண்டுக் கொண்டாட்டத்தில் மூழ்கியிருந்த நேரம். 

சாதாரண மக்கள் போல ஊடுருவியிருந்த ஹோசிமினின் படைகள் திடீரென வெறித்தனமாக தாக்குதலில் ஈடுபட்டு, அமெரிக்க தூதரக அலுவலகத்தை  கைப்பற்றினார்கள். 

எரியும் புத்த பிட்சு 

இந்த அவமானத்தையும் மூக்குடைப்பையும் சகிக்க முடியாத அமெரிக்கா, கட்டுப்பாடில்லாத வன்முறையை கட்டவிழ்த்து விட்டது.  கம்யூனிஸ்ட் என்று சந்தேகம் எழுந்ததால், அப்பாவி பொதுமக்களையும் இரக்கமின்றி சுட்டுக்கொல்லப்பட்டார்கள். ஹோசிமினுக்கு ஆதரவாக புத்த பிட்சுகள் போராட்டங்களில் குதித்தார்கள். அவர்களது போராட்டமுறை வேறுவிதமாக இருந்தது. ஒரு சின்ன கதறலோ, சத்தமோ இன்றி புத்த பிட்சுகள் தங்களை தாங்களே நடுரோட்டில் எரித்துக் கொண்டார்கள். இதையெல்லாம் பார்த்த அமெரிக்க மக்கள், அமெரிக்க அரசை குறை சொல்ல ஆரம்பித்தார்கள். தேர்தல் நெருங்கிக் கொண்டிருந்தததால், வியட்நாமிலிருந்து படைகளை வாபஸ் பெறுவதாக அறிவித்தார் அமெரிக்க அதிபர் நிக்சன். 

அப்படி அறிவித்தாலும், தொடர்ந்து தாக்குதல்கள் நடந்து கொண்டேதான் இருந்தது. 1972-ம் ஆண்டு மார்ச் மாதம், ஒரு வியட்நாம் கிராமம் மீது நோப்பாம் என்ற குண்டை அமெரிக்கா வீச, அந்த கிராமமே தீப்பற்றி எரிந்தது. அந்த சம்பவத்தில் தன் உறவுகளை இழந்த சிறுமி ஒருத்தி நிர்வாணமாக ஓடி வர, அந்த புகைப்படம் ஊடகங்களில் வெளியாகி, உலகத்தை உலுக்கியது. உலக நாடுகள் அமொ¤க்காவை கண்டிக்க, வேறு வழியே இல்லாமல் படைகளை வாபஸ் வாங்கியது அமெரிக்கா. 

வட வியட்நாம், தென் வியட்நாமுடன் இணைந்து ஒரே சுதந்திர நாடானது. ஆனால், அந்த கனவுக்காக போராடின ஹோசிமின், சுதந்திர நாடான வியட்நாமை பார்க்க உயிருடன் இல்லை. அதற்கு முன்னதாகவே அவர் மறைந்துவிட்டார். வெற்றிக்கு அருகே அழைத்து வந்த, அந்த தலைவனை மறக்காத வியட்நாம் மக்கள், ஒருங்கிணைந்த வியட்நாம் தலைநகரான சைகோனுக்கு ஹோசிமின் சிட்டி என்று பெயர் வைத்து கவுரவப்படுத்தினார்கள். 

மே 1 - உலகத் தொழிலாளர்கள் தினம்

ஒருவர் உழைப்பது மகிழ்ச்சியாக உழைப்பது மகிழ்ச்சியாக வாழ்வதற்காகத்தான். ஆனால், ஓய்வின்றி நாள் முழுவதும்  உழைத்தால், களைப்பு ஏற்படுமே ஒழிய மகிழ்ச்சி ஏற்படுவதற்கு வழியில்லை.  தொழில் நிறுவனங்களிலும் 8 மணி நேரம்தான் வேலைநேரமாக நிர்ணயிக்கப் பட்டிருக்கிறது. அதற்கேற்ற வகையிலேயே ஊதியமும் தரப்படுகிறது. 

இந்த 8 மணி நேர வேலை என்பதும், அதற்கேற்ற ஊதியம் என்பதும் எங்கே, எப்போது, எதற்காக, எப்படி நிர்ணயிக்கப்பட்டது?

18-ம் நூற்றாண்டின் இறுதியிலும் 19-ம் நூற்றாண்டின் தொடக் கத்திலும் மேற்கத்திய நாடுகளில் தினமும் 12 முதல் 18 மணி நேரமும், சில சமயங்களில் 20 மணி நேரமும் தொழிலாளர்கள் வேலை செய்யும்படி நிர்ப்பந்திக்கப்பட்டனர். 

இங்கிலாந்தில் தோன்றிய சாசன இயக்கமும், அமெரிக்காவில் உள்ள பாஸ்டனில் கப்பலில் பணியாற்றிய தச்சுத் தொழிலாளர்களும், பென்சில் வேனியா நிலக்கரிச் சுரங்கத் தொழிலாளர்களும், ரயில்வே தொழிலாளர்களும் 10 மணி நேர வேலை கோரிக்கையை முன் வைத்து போராடினர். 1832-ம் ஆண்டு பிலடெல்பியாவிலும், பென்சில்வேனியாவிலும்  இதே கோரிக்கையை முன் வைத்து இயக்கம் நடத்தப்பட்டது.

இதைத் தொடர்ந்து அமெரிக் காவின் பல்வேறு மாநிலங்களில் உள்ள தொழிலாளர் இயக்கங் களும், சிறு வணிகர்கள் கூட்டமைப் பும் இணைந்து 1884-ம் ஆண்டு “ஃபெடரேஷன் ஆஃப் ஆர்கனைஸ்டு டிரேடர்ஸ் அண்ட் லேபர் யூனியனை” உருவாக்கினர். இந்தக் கூட்டமைப்பு 8 மணி நேர வேலை கோரிக்கையை முன் வைத்து ஒரு தீர்மானத்தை நிறைவேற்றியது. இது தொழிலாளர் ஒற்றுமைக்கு பெரிய அளவில் வழிவகுத்தது. இந்தக் கூட்ட மைப்பு,1886 மே 1-ல் நாடு தழுவிய வேலைநிறுத்தத்துக்கு அழைப்பு விடுத்தது. இந்த இயக்கமே மே தினம் பிறப்பதற்குக் காரணம்.

இதையடுத்து 1889 ஜூலை 14-ம் தேதி பாரீஸில் கூடிய சோசலிஷ தொழிலாளர்களின் சர்வதேச தொழிலாளர் பாராளுமன்ற மாநாட்டில், கார்ல் மார்க்ஸ் வலியுறுத்திய 8 மணி நேரப் பணிக்கான போராட்டத்தைத் தொடர்வது என்றும், 1890, மே 1 அன்று சர்வதேச அளவில் தொழி லாளர் இயக்கங்களை நடத்த வேண்டும் என்றும் அறைகூவல் விடுக்கப்பட்டது. உலகத் தொழிலாளர்கள் அனைவரும், 8 மணி வேலை நேரத்துக்காக போர்க்குரல் கொடுக்க வேண்டிய  நாள் மே 1 என்று அறிவிக்கப்பட்டது.

1888-ம் ஆண்டு செயின்ட் லூயிஸ் அமெரிக்கத் தொழிலாளர் கூட்டமைப்பு அதன் தலைவர் சாமுவேல் கோம்பரஸ் தலைமையில் கூடியது. இதையடுத்து 8 மணி நேர வேலை இயக்கத்துக்குப் புத்துயிர் அளிக்கப்பட்டது. சிகாகோ போராளிகளின் தியாகமும், அமெரிக்கத் தொழிலாளர்களின் போராட்டமும்தான் 8 மணி நேர வேலைக்கு அடித்தளமிட்டன. இதன் காரணமாகவே மே மாதம் முதல் தேதி உழைப்பாளர்களின் தினமாக கடைபிடிக்கப்படுகிறது. 

தெரியுமா இவரை - 12 நெப்போலியன்.

உலக வரலாற்றில் இடம்பெற்றுள்ள மாவீரர்கள் பட்டியலில் பிரான்ஸ் நாட்டின் நெப்போலியனுக்கு என்றுமே தனியிடம் உண்டு. கார்சிகா தீவில் 1769-ம் ஆண்டு ஆகஸ்ட் 15-ம் தேதி நெப்போலியன் போனபார்ட் பிறந்தார். இவரது தந்தை ஒரு வழக்கறிஞர். ராணுவ பள்ளியில் கல்வி பயின்ற நெப்போலியன், படிப்பில் ரொம்பவும் சுமார். ஒரு வழியாக படிப்பை முடிந்தபின், ராணுவத்தில் சேர்ந்தார் நெப்போலியன். தனது திறமையால், 1785-ம் ஆண்டு ராணுவ துணைத் தலைவராக உயர்ந்தார். 

1796-ம் ஆண்டு ஆஸ்திரியாவுக்குச் சொந்தமான இத்தாலியப் பகுதிகளை பிடிப்பதற்காக ராணுவம் நெப்போலியனை அனுப்பியது. வீரம், ராஜ தந்திரம், புதிய போர் முறைகள் இவற்றால், அவருக்கு வெற்றி எளிதாக கிட்டியது. பிரெஞ்சு மக்களின் உள்ளம் கவர்ந்த ஹீரோவானார் நெப்போலியன். பின்னர், அவரது பார்வை இங்கிலாந்து நோக்கித் திரும்பியது. கீழை நாடுகளுடன் இங்கிலாந்து கொண்டிருந்த வணிகத் தொடர்புகளை துண்டிக்கும் நோக்கத்துடன், எகிப்து மீது படையெடுத்தார். நைல் நதிக்கரையில் 1798-ம் ஆண்டு நடைபெற்ற இந்த போரில், நெப்போலியன் வெற்றியைத் தவறவிட்டார். 

இதற்கிடையில், பிரான்சில் அரசியல் குழப்பங்கள் ஏற்பட்டன. நாடு திரும்பிய நெப்போலியன், ஆட்சியை கவிழ்த்துவிட்டு, புதிய ஆட்சி அமைப்பை ஏற்படுத்தினார். பிரெஞ்சு புரட்சிகளால் சோர்ந்துபோயிருந்த அந்நாட்டு மக்கள், நெப்போலியன் மூலம் நல்லாட்சி கிடைக்கும் என்று நம்பினர். எனவே, மக்களின் பேராதரவுடன், 1804-ம் ஆண்டு பிரான்ஸ் நாட்டின் சக்ரவத்தியானார் நெப்போலியன். ஆனாலும், தனது ராஜ்ஜியத்தை அவர் விரிவு படுத்த விரும்பினார். முக்கியமாக இங்கிலாந்தை தனது ஆதிக்கத்தின் கீழ் கொண்டு வர விரும்பினார். எனவே, 1805-ம் ஆண்டு ஸ்பெயின் நாட்டின் துணையுடன் இங்கிலாந்து மீது படையெடுத்தார். டிரபால்கர் என்ற இடத்தில் நடைபெற்ற போலில் நெப்போலியன் தோற்றார். ஆனாலும், இங்கிலாந்தின் நேச நாடுகளான ஆஸ்திரியா, பிரஷ்யா, ரஷியா ஆகிய நாடுகளை அவர் கைப்பற்றினார். பின்னர், 1806-ம் ஆண்டில் ஈடு இணையற்ற சக்ரவர்த்தி என்று பட்டம் சூட்டிக்கொண்டார். 

நெப்போலியனுக்கு இரண்டு மனைவிகள். முதல் மனைவி ஜோசபின். இவர் ஏற்கனவே திருமணமானவர். ராணுவ அதிகாரியான அவரது கணவர், பிரெஞ்சு புரட்சியின் போது கொல்லப்பட்டார். விதவையான ஜோசபினை நெப்போலியன் காதலித்து மணந்தார். திருமணத்தின் போது நெப்போலியனுக்கு 27 வயது. அவரை விட ஜோசிபின் 6 வயது மூத்தவர். ஆண் குழந்தை பிறக்கவில்லை என்பதற்காக, நெப்போலியன் பின்னர், ஜோசபினை விவாகரத்து செய்துவிட்டு, ஆஸ்திரிய நாட்டு இளவரசியான மாரி லூயி என்ற பெண்ணை மறுமணம் செய்துகொண்டார். இவர்களுக்கு 1811-ம் ஆண்டு ஆண் குழந்தை பிறந்தது. இதற்கு இரண்டாம் நெப்போலியன் என்று பெயரிட்டனர். 

ஸ்பெயின், போர்ச்சுக்கல் ஆகிய நாடுகளைத் தன் ஆதிக்கத்தின் கீழ் கொண்டுவர நெப்போலியன் செய்த முயற்சிகள் அந்த நாடுகளில் நெப்போலியனுக்கு எதிர்ப்பை உண்டாக்கின. ஒப்பந்தப்படி நடக்கத் தவறியதால், ரஷியா மீது 1812-ம் ஆண்டு நெப்போலியன் மீண்டும் படையெடுத்தார். ஆனால், இதில், அவர் பெருந்தோல்வியைத் தழுவினார். ரஷியாவுக்குச் சென்ற நான்கரை லட்சம் பிரான்ஸ் நாட்டு வீரர்களில், 20 ஆயிரம் பேர் மட்டுமே உயிருடன் திரும்பினர். இந்த தோல்வி, நெப்போலியனை ஆட்டம் காணச் செய்தது. பதுங்கியிருந்த ஐரோப்பிய நாடுகள் அவரை எதிர்க்கத் துணிந்தன. இங்கிலாந்து, ஆஸ்திரியா, ரஷியா, பிரஷ்யா ஆகிய நாடுகள் பிரான்ஸ் மீது படையெடுத்தன. 1814-ம் ஆண்டு நடைபெற்ற போரில் நெப்போலியன் தோற்கடிக்கப்பட்டு, எல்பா தீவுக்கு நாடுகடத்தப்பட்டார். எனினும், அங்கிருந்த தப்பிய அவர், மறுபடியும் படை திரட்டி போருக்குத் தயாரானார். 

1815-ம் ஆண்டு வாட்டர்லூ என்ற இடத்தில் நெப்போலியனின் படைகளும், இங்கிலாந்து படைகளும் சந்தித்து கடும் போர் புரிந்தன. இதிலும், நெப்போலியனுக்குத் தோல்வியே கிட்டியது. பாரிஸ் நகருக்குத் திரும்பிய நெப்போலியன், பதவி விலக, போசிடி என்பவன் தலைமையில் புதிய ஆட்சி அமைக்கப்பட்டது. பின்னர், கப்பல் மூலம் நெப்போலியன் நாட்டை விட்டு வெளியேற முயன்றார். அப்போது, பிளிமத் துறைமுகத்தில் நெப்போலியனை கைது செய்த இங்கிலாந்து ராணுவம், அவரை ஹெலீனா என்ற தீவில் சிறை வைத்தது. 15 கிலோ மீட்டர் நீளமும், 10 கிலோ மீட்டர் அகலமும் கொண்ட சிறிய தீவில், சுகாதாரமற்ற வீட்டில் அவர் காவலில் வைக்கப்பட்டார். புத்தகங்கள் படிப்பதிலேயே பெரும்பாலான நேரத்தைக் கழித்த நெப்போலியன், உடல் நலம் குன்றி, 1821-ம் ஆண்டு மே 15-ம் தேதி தமது 52 வது வயதில் மரணமடைந்தார். ஹெலீனா தீவிலேயே அவரது உடல் ராணுவ மரியாதையுடன் அடக்கம் செய்யப்பட்டது. 

தெரியுமா இவரை - 11 பெஞ்சமின் ஃபிராங்களின்

'இறந்த பிறகும் நீங்கள் மறக்கப்படாமல் இருக்க வேண்டுமென்றால்; சிறந்த படைப்புகளை உருவாக்குங்கள் அல்லது பிறர் உங்களைப் பற்றி எழுதும் அளவுக்கு அர்த்தமுள்ள வகையில் வாழுங்கள்' என்றவர் பெஞ்சமின் ஃபிராங்களின். சொன்னதோடு நிற்காமல் இரண்டு விதமாகவும் சாதனை மனிதராக வாழ்ந்து காட்டியவர் அவர். 

விஞ்ஞானி, அரசியல்வாதி, வணிகர், இலக்கியவாதி, பத்திரிகையாளர், கல்வியாளர் என பல முகங்களுடன் இயங்கிய பெஞ்சமின் ஃபிராங்கிளின், மின்சாரம் பற்றியும் இடி மின்னல் பற்றியும் புகழ்பெற்ற ஆராய்ச்சிகளை செய்து இடி தாங்கியையும், வெள்ளெழுத்துக் கண்ணாடி உள்பட பல்வேறு கருவிகளையும் கண்டுபிடித்தவர். அரசியலில் சட்டமன்ற உறுப்பினராக, அரசதந்திரியாக, பிரான்சுக்கான தூதராக விளங்கியவர். அமெரிக்க சுதந்திர பிரகடணத்தை தயார் செய்து கையெழுத்திட்ட மூவரில் ஒருவர். இப்படி பல பரிமாணங்களில் பிரகாசித்த அவரை அமெரிக்காவின் பிரபலமான குடிமகன் என்றும் அழைக்கிறது வரலாறு. 

1706 ஆம் ஆண்டு ஜனவரி 17-ஆம் நாள் அமெரிக்காவின் பாஸ்டன் நகரில் பிறந்தார் ஃபிராங்கிளின். 17 பிள்ளைகளில் இவர் பத்தாவது. அவரது தந்தையார் சோப்புக் கட்டிக்களையும், மெழுகுவர்த்திகளையும் தயாரித்து பாஸ்டன் நகரம் முழுவதும் சுற்றித் திரிந்து விற்பனை செய்வார். பெரிய குடும்பம் என்பதால் அவர்கள் வீட்டில் வறுமை வசதியாக் ஆட்சி செய்தது. குடும்ப ஏழ்மையின் காரணமாக ஃபிராங்கிளினை பள்ளிக்கு அனுப்பகூட அவரிடம் பணம் இல்லை. ஃபிராங்கிளின் பள்ளி சென்றது ஓராண்டுக்கும் குறைவாகத்தான் இருக்கும். ஆனாலும் தனது ஏழாவது வயதிலேயே கவிதைகள் எழுதத் தொடங்கினார். அதுமட்டுமல்ல பள்ளிக்கு செல்லாவிட்டாலும் தன் தந்தையின் தொழிலில் உதவி செய்துகொண்டே தனக்குக் கிடைத்த நேரத்தில் அவர் நான்கு மொழிகளைக் கற்றுக்கொண்டார் 

புத்தகங்கள் வாசிப்பதில் இருந்த ஆர்வம் காரணமாகவே அவர் தனது சகோதரர் ஜேம்ஸின் அச்சுக்கூடத்தில் வேலைக்குச் சேர்ந்தார். அங்கு அச்சுப் பணிகளைக் கற்றுக்கொண்டதோடு அச்சுக்கு வரும் அத்தனை புத்தகங்களையும் படித்துவிடுவார்.  வாசிப்பின் காரணமாக, சுவாரசியமாக எழுதும் திறமையும் வந்தது. பிறகு, தனது சகோதரருடன் ஏற்பட்ட மனத்தாங்கல் காரணமாக அவர் வீட்டை விட்டு வெளியேறி பிலடெல்பியா  வந்தடைந்தார். அங்கும் அச்சுத்தொழிலில் ஈடுபட்டு சொந்தமாக அச்சு நிறுவனத்தைத் தொடங்கினார்.

பத்திரிக்கைகளில் எழுதத் தொடங்கியதால், புகழும் சேரத் தொடங்கியது. 1720 ஆம் ஆண்டு 'பென்சில்வேனியா கெசட்' என்ற பத்திரிக்கையை விலைக்கு வாங்கினார் ஃபிராங்கிளின். நான்கு ஆண்டுகள் கழித்து 'புவர் ரிச்சர்ட் அல்மனாக்' என்ற பத்திரிகையை தொடங்கினார். மிகவும் வித்தியாசமான பாணியில் வெளிவந்த அந்த பத்திரிகை, அவருக்கு செல்வத்தையும், பெரும் புகழையும் கொண்டு வந்து சேர்த்தது. அச்சுத்துறையில் புதுமைகள் செய்த அதே வேளையில் புதிதாக எதையாவது கண்டுபிடிக்க வேண்டும் என்ற ஆர்வமும் அவரிடம் இருந்தது. குறைவான எரி சாதனத்துடன் மிகுந்த வெப்பம் தரக்கூடிய அடுப்பை அவர் கண்டுபிடித்தார். அவற்றைத் தயாரித்து விற்கவும் தொடங்கினார். பயிர்களுக்காக செயற்கை உரத்தை உருவாக்கியவரும் அவரே.

மின்சாரத்தின் மீது ஆய்வுகள் செய்த அவர் மின்னலில் கூட மின்சக்தி இருக்கிறது என்பதை கண்டறிந்தார். கூரிய முனைகளால் மின்சாரம் ஈர்க்கப்படுகிறது அதேபோல் மின்னலும் கூரிய முனைகளால் ஈர்க்கப்படும் என்பதைக் கண்டுபிடித்து மின்னல் இடியிலிருந்து கட்டிடங்களைப் பாதுகாக்க இடிதாங்கியைக் கண்டுபிடித்தார். முதியவர்கள் தூரப் பார்வைக்கும், கிட்டப் பார்வைக்கும் சேர்த்து அணியும் வெள்ளெழுத்து கண்ணாடியும் அவரது கண்டுபிடிப்புதான். தனது கண்டுபிடிப்புகள் எதற்கும் அவர் காப்புரிமை பெற்றதில்லை.

பத்திரிகைகளை சந்தா செலுத்தி, வாங்கிப் படிக்கும் முறையை அறிமுகம் செய்தவரும் ஃபிராங்க்ளின்தான். பிலடெல்பியாவின் தபால் துறையில் பல மாற்றங்களை செய்து தற்கால தபால் துறை பின்பற்றும் பல கொள்கைகளை உருவாக்கித் தந்தார். 1730-ஆம் ஆண்டு நடமாடும் நூல் நிலையம் என்ற அற்புத திட்டத்தை உலகுக்கு அறிமுகம் செய்தார். அதனைத் தொடர்ந்து அமெரிக்காவின் முதல் தீ காப்பீட்டு நிறுவனத்தை அவர் உருவாக்கினார்.  உலகப் புகழ்பெற்ற அமெரிக்கப் பல்கலைக்கழகங்களுள் ஒன்றான 'பென்சில்வேனியா  பல்கலைக்கழகம்' அவர் நிறுவியதுதான். 1749-ஆம் ஆண்டு அது நிறுவப்பட்டது. அடுத்த இரண்டு ஆண்டுகள் கழித்து அமெரிக்காவின் முதல் மருத்துவமனையைத் தோற்றுவித்தார் ஃபிராங்கிளின்.

1789 ஆம் ஆண்டு அமெரிக்காவின் முதல் அதிபராக தேர்ந்தெடுக்கப்பட்ட ஜார்ஜ் வாஷிங்டென் அமெரிக்காவின் அரசியல் சட்டத்தை இயற்றும் மாபெரும் பொறுப்பை பெஞ்சமின் ஃபிராங்கிளினை உள்ளடக்கிய ஒரு குழுவிடம் ஒப்படைத்தார். அவரது மேற்பார்வையில் உருவான அரசியல் சட்டம்தான் இன்றும் அமெரிக்காவை வழிநடத்துகிறது. 

சுதந்திரம் அடைந்த பிறகு அமெரிக்கா முதன் முதலாக இரண்டு அஞ்சல் தலையை வெளியிட்டது. ஒன்றில் அமெரிக்காவின் முதல் அதிபரான ஜார்ஜ் வாஷிங்டெனின் படம். மற்றொன்றில் பெஞ்சமின் ஃபிராங்கிளினின் படம். அமெரிக்காவுக்கும், உலகுக்கும் மிகப்பெரிய பங்களிப்பைச் செய்த அந்த மாமனிதனுக்கு அந்த தபால் தலை மூலம் நன்றி தெரிவித்துக்கொண்டது அமெரிக்க தேசம். கடைசி நாள் வரை ஓய்வு என்பதையே அறியாமல் உழைத்த ஃபிராங்கிளின் 1790 ஆம் ஆண்டு ஏப்ரல் 17-ஆம் தேதி தனது 84 ஆவது வயதில் காலமானார். 

தெரியுமா இவரை - 10 சாக்ரடீஸ்

மக்களை சிந்திக்கத் தூண்டியதற்காக, ஆட்சியாளர்களின் கோபத்துக்கு ஆளாகி மரண தண்டனை பெற்றவர் தத்துவஞானி சாக்ரடீஸ். கிரேக்க நாட்டின் தலைநகரான ஏதென்சில் கி.மு. 470-ம் ஆண்டு பிறந்தவர் சாக்ரடீஸ். இவரது தந்தை ஒரு சிற்பி. தாயார் மருத்துவச்சி. அந்த காலத்தில் முறையான கல்வி கற்க வசதியில்லாததால், சுயமாகவே அவர் அறிவை வளர்த்துக் கொண்டார். சதா சிந்தனையுடன் இருப்பதும், ஊர் சுற்றுவதும் அவருக்கு பிடித்தமான பொழுதுபோக்குகள். குடும்பத்தின் வறுமை காரணமாக, தந்தையின் சிற்பத் தொழிலை கற்றுக் கொண்டு, சில காலம் அந்த வேலையை செய்தார். எனினும், அதில் போதிய வருவாய் கிடைக்கவில்லை. 

அந்த காலக்கட்டத்தில், ஏதென்சில் வசிப்பவர்கள், குடும்பத்திற்கு ஒருவரை ராணுவத்திற்கு அனுப்ப வேண்டும் என்பது அந்நாட்டு சட்டம். எனவே, சாக்ரடீசை அவரது பெற்றோர் ராணுவத்திற்கு அனுப்பினர். குறிப்பிட்ட காலம் வரை ராணுத்தில் பணியாற்றிவிட்டு வீடு திரும்பிய, சாக்ரடீஸ் அதன் பிறகு வேறு எந்த தொழிலும் செய்யவில்லை. காலையில் எழுந்ததும் ஊர் சுற்றக் கிளம்பிவிடுவார். மக்கள் கூடும் இடங்களில் நின்று, பகுத்தறிவு பிரச்சாரம் செய்யத் தொடங்கி விடுவார். 

சாக்ரடீஸ் மெர்டன் என்ற பெண்ணை திருமணம் செய்துகொண்டார். அவர்களது இனிய இல்லறத்தின் விளைவாக இரண்டு குழந்தைகள் பிறந்தன. தனது கணவர் சிறந்த அறிவாளி என்று மெர்டன் பெருமை கொண்டிருந்தாள்.

ஆனால், மெர்டன் உடல்நலம் குன்றி இறந்துவிட்டாள். மனைவியின் இறப்பால், பெரிதும் துயரம் அடைந்த சாக்ரடீஸ், தன் குழந்தைகளை பராமரிப்பதற்காக, சாந்திபி என்ற பெண்ணை இரண்டாவதாக திருமணம் செய்துகொண்டாள். சாந்திபி, மெர்டனுக்கு நேரெதிரான குணங்களை கொண்டிருந்தாள். சாக்ரடீசின் பகுத்தறிவு பிரச்சாரங்களை, வெறும் வெட்டிப்பேச்சு என்றாள் அவள். இவளுக்கும் இரண்டு குழந்தைகள் பிறந்தன. 

சாக்ரடீசின் பகுத்தறிவு பிரச்சாரம், ஆட்சியாளர்களுக்கு கிளியை ஏற்படுத்தின. அவருடைய பேச்சைக் கேட்டு, மக்கள் சிந்திக்கத் தொடங்கினால், அது தங்களுக்கு ஆபத்து என்று கருதினார்கள். எனவே, பிரச்சாரத்தை நிறுத்திக் கொள்ளுமாறு அவரை எச்சரித்தார்கள். ஆனால், சாக்ரடீஸ் தனது போக்கை மாற்றிக் கொள்ளவில்லை. இதனால், ஆத்திரமடைந்த ஆட்சியாளர்கள், நாத்திக பிரச்சாரம் செய்து, இளைஞர்களின் மனதை கெடுக்கிறார் என்று குற்றம்சாட்டி, அவரை கைது செய்து நீதிமன்றத்தில் நிறுத்தினர். 

விசாரணைக்குப் பின், சாக்ரடீஸ் குற்றவாளியா, இல்லையா என்று நீதிமன்றத்தில் வாக்கெடுப்பு நடத்தப்பட்டது. சாக்ரடீஸ் குற்றவாளி என்று 281 பேரும், குற்றவாளி இல்லை என்று 220 பேருக்கும் வாக்களித்தனர். 61 ஓட்டு வித்தியாசத்தில் சாக்ரடீஸ் குற்றவாளி என்று முடிவாயிற்று. இனி பிரச்சாரம் செய்ய மாட்டேன் என்று உறுதியளித்தால், தண்டனையிலிருந்து தப்பிக்கலாம் என்று ஆட்சியாளர்கள் ஆசை காட்டினர். சாக்ரடீஸ் அதை மறுத்து, உயிருள்ளவரை பிரச்சாரத்திற்கு ஓய்வு கொடுக்கமாட்டேன் என்றார். எனவே, நாடு கடத்துவது, அல்லது பெருந்தொகை ஒன்றை அபராதமாக செலுத்துவது என்று இரண்டு தண்டனைகள் அவர் முன் வைக்கப்பட்டன. இரண்டையும் சாக்ரடீஸ் ஏற்க மறுத்தார். 

சாக்ரடீசின் போக்கு ஆட்சியாளர்களை அவமதிக்கும் வகையில் உள்ளது என்று கூறி, அவருக்கு மரண தண்டனை விதித்தனர். அவரை தண்டனையிலிருந்து காப்பாற்ற, உறவினர்களும் நண்பர்களும் முயற்சி செய்தனர். ஆனால், அதற்கு சாக்ரடீஸ் சம்மதிக்கவில்லை. சிறையில் அடைக்கப்பட்ட அவருக்கு, 'ஹெமலாக்' என்ற கொடிய விஷம் கோப்பையில் கொடுக்கப்பட்டது. அதை வாங்கி, கொஞ்சமும் அஞ்சாமல் குடித்துவிட்டு, தரையில் சரிந்தார் சாக்ரடீஸ். அப்போது அவருக்கு வயது 70. 

தெரியுமா இவரை - 8 கிளியோபாட்ரா

பேரழகி என்ற சொல்லுக்கு இலக்கணமாக திகழ்ந்தவள் எகிப்து நாட்டின் ராணியான கிளியோபாட்ரா. கி.மு. 51-ம் ஆண்டில் எகிப்து நாட்டை ஆண்டை தாலமி மன்னனின் மகள் இவள். தாலமி இறப்பதற்கு முன், கிளியோபாட்ராவும், அவள் தம்பியும் திருமணம் செய்துகொண்டு நாட்டை ஆள வேண்டும் என்று மன்னர் விருப்பப் பட்டார். தாலமி வம்சத்தில், பிற வம்சத்தின் ரத்தக் கலப்பு ஏற்பட்டுவிடக் கூடாது என்று அக்காலத்தில் இத்தகைய திருமணங்கள் சாதாரணம். தந்தையின் ஆசைப்படி, கிளியோபாட்ரா, தனது தம்பி ஏழாவது தாலமியை மணந்துகொண்டு, நாட்டின் ஆட்சிப் பொறுப்பை ஏற்றாள். அப்போது, கிளியோபாட்ராவுக்கு வயது 16. தம்பிக்கு 10 வயது. 

அமைச்சர்களும், பிரபுக்களும் தாலமியை தங்கள் கைப்பாவையாக்கிக் கொண்டனர். அவர்களின் தூண்டுதலால், கிளியோபாட்ராவை விரட்டியடித்துவிட்டு, தாலமி ஆட்சியை கைப்பற்றினான். சிரியாவுக்கு தப்பி ஓடிய கிளியோபாட்ரா, மீண்டும் ஆட்சியை பிடிக்க, படை திரட்டும் முயற்சியில் இறங்கினாள். 

ரோம் நாட்டை ஆண்டு வந்த ஜூலியஸ் சீசர், இந்த நேரத்தில், எகிப்து மீது படையெடுத்தார். அவரிடம் உதவி கேட்டாள் கிளியோபாட்ரா. அவளது அழகில் மயங்கிய சீசர், உதவுவதாக வாக்களித்தார். பின்னர், ஜூலியஸ் சீசருக்கும், தாலமிக்கும் நடந்த சண்டையில் தாலமி கொல்லப்பட்டான். ரோமாபுரி ஆதிக்கத்தின் கீழ் வந்த எகிப்துக்கு கிளியோபாட்ராவை ராணி ஆக்கிய சீசர், அவளுடன் வாழத் தொடங்கினார். அவர்களுக்கு 'சிசேரியன்' என்ற மகன் பிறந்தான். 

சில காலத்துக்குப் பின்னர், கிளியோபாட்ராவுடன், ரோமாபுரிக்கு திரும்பிய சீசரை, அவரது நெருங்கிய நண்பன் புரூட்டஸ் சதிகாரர்களுடன் இணைந்து, கி.மு. 44-ம் ஆண்டு மார்ச் 15-ம் நாள் கத்தியால் குத்தி கொலை செய்தான். மனம் உடைந்த கிளியோபாட்ரா எகிப்து திரும்பினாள். 

சீசரின் நம்பிக்கைக்குரிய தளபதியான ஆண்டனி, சதிகாரர்களை நாட்டை விட்டு விரட்டி, ஆட்சியை கைப்பற்றினான். பின்னர், சீசரின் வளர்ப்பு மகன் ஆக்டேவியசும், ஆண்டனியும் ரோமாபுரியை ஆண்டு வந்தனர். ரோமாபுரியின் ஆதிக்கத்தின் கீழ் இருந்த எகிப்துக்கு ஆண்டனி சென்றபோது, கிளியோபாட்ராவின் அழகில் மயங்கினான். இருவரும் சேர்ந்து வாழத் தொடங்கினார்கள். ஏற்கனவே, ஜூலியஸ் சீசருடன், கிளியோபாட்ரா வாழ்ந்திருந்தாலும், அவரை விட பன்மடங்கு ஆண்டனியை நேசித்தாள். 

இவருவரது உல்லாச வாழ்க்கைப் பற்றி, தவறான தகவல்கள் ரோமாபுரியில் பரவியதால், மக்கள் ஆண்டனியை வெறுக்கத் தொடங்கினர். ஆக்டேவியசின் செல்வாக்கு பெருகியது. ரோமுக்கு வந்த ஆண்டனி, ஆக்டேவியசுடன் நட்பை புதுப்பித்துக் கொண்டான். ஆனாலும், ஆக்டேவியசின் செல்வாக்கு வளர்வதைக் கண்டு மனம் புழுங்கிய ஆண்டனி, மீண்டும் எகிப்து திரும்பினான். இதனால், ஆக்டேவியசுக்கும், ஆண்டனிக்கும் இடையில் பகை முற்றியது. இதற்கு இடையில், கிளியோபாட்ரா-ஆண்டனியின் காதல் வாழ்க்கைக்கு சாட்சியாக இரண்டு குழந்தைகள் பிறந்தன. 

கிளியோபாட்ரா மூலம் தனக்கு பிறந்த இரண்டு குழந்தைகளுக்கும், சீசருக்கு பிறந்த சிசேரியனுக்கும் ஆசிய நாடுகளின் அரசுரிமையை அளிப்பதாக ஆண்டனி அறிவித்தான். கிளியோபாட்ராவுடன் சேர்ந்து எகிப்து பேரரசை உருவாக்க ஆண்டனி முயற்சிப்பதாகவும், இது ரோமாபுரிக்கு பெரும் ஆபத்தாக முடியும் என்றும் ஆக்டேவியஸ் கருதினான். இதனால், ஆத்திரமடைந்த ஆக்டேவியஸ், கி.மு. 31-ல் எகிப்து மீது படையெடுத்தான். ஆண்டனியின் கடற்படையும், ஆக்டேவியசின் கடற்படையும் 'ஆகடியம்' என்ற இடத்தில் சந்தித்து மோதின. இதில், ஆண்டனியின் படைகள் தோற்றன. 

ஆக்டேவியசுடன் ஆண்டனி சமாதானம் செய்துகொள்வதற்கான முயற்சிகளில் இருந்தபோது, கிளியோபாட்ரா தற்கொலை செய்துகொண்டதாக வதந்தி பரவியது. இதை உண்மை என்று நம்பிய ஆண்டனி, மனம் உடைந்து, கத்தியால் குத்திக் கொண்டு, தற்கொலை செய்துகொண்டான். ஆண்டனியின் மரணத் தகவல் கேட்டு, கிளியோபாட்ரா அதிர்ச்சியடைந்தாள். ஆண்டனியை பிரிந்து, அவளும் உயிர் வாழ விரும்பவில்லை. எனவே, கொடிய விஷப் பாம்புகளை தன்னை கடிக்கவிட்டு, கிளியோபாட்ராவும் தற்கொலை செய்துகொண்டாள். இருவரது உடல்களும் அருகருகே அடக்கம் செய்யப்பட்டன. 

தெரியுமா இவரை - 7 ஜான் லோகி பேர்ட்

1922 ஆம் ஆண்டில் வானொலி உலகுக்கு கிடைத்தபோது ஒரு பெட்டியில் குரலைக் கேட்க முடியுமா என்று அதிசயித்த உலகம் அடுத்த நான்கே ஆண்டுகளில் ஒரு பெட்டியில் குரலைக் கேட்பதோடு உருவங்களையும் பார்க்க முடியும் என்பதை கற்பனை செய்துகூட பார்த்திருக்காது. ஆனால் கற்பனை செய்பவர்கள்தானே கண்டுபிடிப்புகளையும் செய்கிறார்கள். ஒரு பெட்டிக்குள் ஒலியையும், ஒளியையும் காட்ட வேண்டும் என்று கற்பனை செய்து கனவு கண்டு தொலைக்காட்சி என்ற உன்னத சாதனத்தை உலகுக்குத் தந்த ஒருவரைத்தான் தெரிந்துகொள்ளவிருக்கிறோம். அவர் பெயர் John Logie Baird. வானொலியின் தந்தை Marconi என்றால் தொலைக்காட்சியின் தந்தை Baird.

1888 ஆம் ஆண்டு ஆக்ஸ்ட் மாதம் 13-ம் தேதி ஸ்காட்லாந்தின் கிளாஸ்கோ நகருக்கு அருகில் ஹெலன்ஸ்பர்க் என்ற இடத்தில் பிறந்தார் ஜான் லோகி பேர்ட். நான்கு பிள்ளைகளில் அவர்தான் கடைக்குட்டி. அவரது தந்தை போதகர். குறைந்த வருமானத்தில் பெரிய குடும்பத்தை நிர்வகித்து வந்தார். பேர்ட் சிறுவயது முதலே ஆரோக்கியம் குன்றியிருந்தார். அதனாலோ என்னவோ அவருக்கு விளையாட்டு, பொழுதுபோக்கு போன்றவற்றில் அதிக நாட்டம் இல்லை. 

வீட்டுக்கு அருகில் இருந்த தொடக்கப்பள்ளியில் ஆரம்பக்கல்வியைக் கற்றார் பேர்ட். அவருக் சிறுவயதிலிருந்தே புகைப்படங்களின் மீது அதிக ஆர்வம் இருந்தது. அந்தக்காலக் கட்டத்தில் இங்கிலாந்து பள்ளிகளில் பல இணைப்பாடங்கள் கற்பிக்கப்பட்டன. அவற்றுள் ஒன்று புகைப்படக்கலை பேர்ட் அதில் அதிக ஆர்வம் காட்டி புகைப்படக்கலை சங்கத்தின் மாணவர் தலைவராகவும் செயல்பட்டார். அறிவுக்கூர்மையும் கைகொடுக்க பேர்ட் தனது 12-ம் வயதிலேயே சில நண்பர்களுடன் சேர்ந்து படங்கள் காட்சிகள் பற்றியும், நகரும் காட்சிகள் பற்றியும் சோதனைகளை செய்தார்.

17 ஆம் வயதில் லண்டன் ராயல் தொழில்நுட்பக் கழகத்தில் மின்பொருளியல் துறையில் சேர்ந்து முதல் நிலையில் தேறினார். பின்னர் கிளாஸ்கோ பல்கலைக்கழகத்தில் பட்டம் பெற்றார். பல்கலைக் கழகத்தில் படித்துக் கொண்டிருந்தபோதே செலினியம் செல்களைக் கொண்டு ஒளியை மின் சமிக்ஞைகளாக மாற்ற முடியும் என்று நம்பிய பேர்ட் பல்கலைக் கழகத்தில் அதற்கான ஆய்வுகள் செய்ய முடியாததால் வீட்டிலேயே ஆய்வுகளை மேற்கொண்டார். மின்சாரம் மூலம் ஒளியையும் பேசும் படத்தையும்கூட அனுப்ப முடியும் என்ற நம்பிக்கை அவரிடம் எப்போதுமே இருந்தது. பட்டம் பெற்ற பிறகு ஒரு நிறுவனத்தில் உதவிப் பொறியாளராக வேலைக்குச் சேர்ந்தார். 26 ஆவது வயதில் மின்னணுத்தொழிற்சாலை ஒன்றில் பணி கிடைத்தது. அவற்றிலெல்லாம் மன நிறைவடையாத பேர்ட் முற்றிலும் மாறாக காலுறை உற்பத்தி செய்யும் சொந்தத் தொழில் ஒன்றை தொடங்கினார். ஆனால் அதில் அவ்வளவு இலாபம் கிட்டவில்லை பின்னர் ரொட்டியில் தடவும் ஜாம் மற்றும் ச்சாஸ் தயாரிப்பில் இறங்கினார். உடல் ஆரோக்கியம் குன்றியதால் அந்தத் தொழிலையும் கைவிட வேண்டிய நிலை ஏற்பட்டது. 

அந்தச் சமயத்தில் ட்ரினிடேடில் இருக்கும் தன் நண்பரை பார்க்க கப்பல் பயணம் மேற்கொண்டார் பேர்ட். அப்போது கப்பலில் வானொலி இயக்கும் ஊழியரிடம் அவருக்கு நட்பு ஏற்பட்டது. வானொலி ஒலியை ஒலிபரப்புவதுபோல் படங்களை ஓர் இடத்திலிருந்து மற்றொரு இடத்திற்கு எவ்வாறு ஒலிபரப்பலாம் என்பதுபற்றி இருவரும் நிறைய விவாதித்து கருத்துக்களைப் பகிர்ந்துகொண்டனர். 1922 ஆம் ஆண்டில் தனது 34 ஆவது வயதில் லண்டன் திரும்பினார் பேர்ட். வேலையில்லாத காரணத்தால் அவர் வறுமையில் வாடினாலும் தொலைக்காட்சிப் பற்றிய கனவு மட்டும் அவரைவிட்டு நீங்கவில்லை. தொலைக்காட்சிப் பெட்டியின் செயல் முறைக்கான வரைப் படத்தை உருவாக்கி அட்டைப்பெட்டி, மின்மோட்டார், புரொஜ்க்ஸன் விளக்கு, மின் கலங்கள், நியான் விளக்கு, வானொலி வால்வுகள் போன்றவற்றை வைத்து பல வகையான ஆய்வுகளை செய்து பார்த்தார். 

இரண்டு ஆண்டுகள் அவர் உழைத்த உழைப்புக்கு 1924 ஆண்டு பலன் கிட்டுவதுபோல் தெரிந்தது. ஒரு சிலுவையின் நிழலை பத்து மீட்டர் தூரத்திற்கு அவரால் ஒலிபரப்ப முடிந்தது. மேற்கொண்டு ஆய்வைத் தொடர அவருக்கு பொருளாதார வசதி இல்லை உண்மையில் தனது ஆய்வுக்கருவிகளின் பாகங்களை விற்று சாப்பிடும் நிலைக்குக்கூடத் தள்ளப்பட்டார் அப்படியிருந்தும் மனம் தளரவில்லை பேர்ட். எப்படியாவது மனித முகத்தையும், நகரும் காட்சியையும் ஒரு பெட்டிக்குள் கொண்டு வந்துவிட வேண்டும் என்று முயன்றுகொண்டே இருந்தார். ஆய்வுக்கு பணமில்லாததால் உதவிகேட்டு செய்தித்தாள்களில் விளம்பரம் செய்தார். அதில் கிடைத்த உதவியைக் கொண்டு அடுத்த ஆண்டே தொலைக்காட்சியின் ஆரம்ப மாதிரியை இயக்கிப் பார்த்தார். எந்தக் குறையுமின்றி முழுப்படமும் திரையில் துல்லியமாகத் தெரிந்தது பேர்ட் மலைத்துப்போனார். 

அந்த நாள்தான் அதாவது 1925 ஆம் ஆண்டு அக்டோபர் 2-ம் தேதிதான் உலகுக்கு தொலைக்காட்சி கிடைத்த நாள். அடுத்த நான்கு ஆண்டுகளுக்குள் வண்ணத் தொலைக்காட்சிப் பற்றியும் ஆய்வு செய்து அதனையும் வெற்றிகரமாக உருவாக்கினார். 1929ல் பிரிட்டிஷ் ஒலிபரப்புக் கழகத்திற்காக கறுப்பு வெள்ளைத் தொலைக்காட்சி சேவையைத் தொடங்கினார். தொலைக்காட்சி இல்லாத ஒரு உலகை நினைத்துப் பார்ப்பது சற்று சிரமம்தான். நமது வரவேற்பறைக்குள் உலகத்தைக் கொண்டு வர உதவிய அந்த முன்னோடி ஜான் லோகி பேர்ட்  1946 ஆம் ஆண்டு ஜூன் 14ந்தேதி தமது 58 ஆவது வயதில் காலமானார். 

தெரியுமா இவரை - 6 சர்' ஐசக் நியூட்டன்

ஒரு பொருள் கீழே விழுவது இயற்கை என்றாலும், அதன் பின்னால் உள்ள அறிவியல் உண்மையை சிந்தித்தவர் சர் ஐசக் நியூட்டன். அதன் மூலம்தான் புவியின் ஈர்ப்பு விசையைப் பற்றி உலகம் தெரிந்துகொண்டது. அந்த மாபெரும் கண்டுபிடிப்பைச் செய்த நியூட்டன்,  1642 ஆம் ஆண்டு கிறிஸ்துமஸ் தினத்தன்று (டிசம்பர்-25) இங்கிலாந்தில் ஒரு சராசரி விவசாய குடும்பத்தில் பிறந்தார். 

நியூட்டன் படிப்பில் சராசரி மாணவர்தான். வறுமை காரணமாக படிப்பை கைவிட வேண்டிய நிலை ஏற்பட்டது அவருக்கு. ஆனால், சிறுவயதிலேயே அவருக்கு அறிவியலில் அலாதி பிரியம். தண்ணீரிலும் வேலை செய்யும் கடிகாரத்தை அவர் சிறுவயதிலேயே உருவாக்கினார். 

நியூட்டனின் திறமையை  அறிந்துகொண்ட அவரது மாமன் புகழ்பெற்ற கேம்ப்ரிட்ஜ் பல்கலைக்கழகத்தின் டிரினிடி கல்லூரியில் சேர்த்து படிக்க வைத்தார். 1665 ஆம் ஆண்டு இளங்கலை பட்டப்படிப்பை முடித்தார் நியூட்டன். அவர் பட்டம் பெற்ற இரண்டு ஆண்டுகளில் நவீன கணிதத்தின் பல்வேறு கூறுகளை அவர் கண்டுபிடித்தார். 

வளைந்தப் பொருள்களின் பரப்பையும் கெட்டியான பொருள்களின் கொள்ளளவையும் கண்டுபிடிக்கும் முறைகள் அவர் வகுத்து தந்தவைதான். ஒருமுறை அவர் தனது தோட்டத்தில் நடந்து கொண்டிருந்தபோது ஓர் ஆப்பிள் பழம் மரத்திலிருந்து கீழே விழுவதைப் பார்த்தார். நியூட்டனுக்கு முன் தோன்றி மறைந்த மனிதர்கள் அனைவரும் பார்த்திருக்கக்கூடிய சாதாரணக் காட்சிதான் அது. நியூட்டனுக்கு அது சாதாரணமாகப்படவில்லை. அதைப்பற்றி சிந்தித்தார் நியூட்டன். 

ஏதோ ஒரு கண்ணுக்குத் தெரியாத ஒரு சக்திதான் ஆப்பிளை பூமியில் விழச்செய்கிறது என்று ஊகித்தார் நியூட்டன். உலகில் புவி ஈர்ப்பு விசை என்ற சக்தி இருப்பதால்தான் எல்லாப் பொருள்களும் கீழே விழுகின்றன. நாமும் மிதக்காமல் நடக்கிறோம் என்பது நியூட்டன் கண்டுபிடித்துச் சொன்ன உண்மை. அது அவரது மகத்தான் கண்டுபிடிப்பு. 

1667 ஆம் ஆண்டு தனது 25-ஆவது வயதில் நியூட்டன் டிரினிடி கல்லூரியில் இயற்பியல் பேராசிரியராக நியமிக்கப்பட்டார். டிரினிடி கல்லூரியில் அவருக்கு கௌரவ பொறுப்பு வழங்கப்பட்டது. அடுத்த சில ஆண்டுகளை அவர் முழுநேரமாக பல்வேறு ஆராய்ச்சிகளில் செலவிட்டார். ஒளியின் தன்மைப் பற்றி ஆழமாக ஆராய்ந்ததோடு தொலைநோக்கிகளை உருவாக்குவதிலும் கவனம் செலுத்தினார். ஓராண்டில் அவர் ஓர் தொலைநோக்கியையும் உருவாக்கினார். அதன்மூலம் ஜூபிடர் கோலின் நிலவுகளை அவரால் பார்க்க முடிந்தது. 1669 ஆம் ஆண்டு டிரினிடி கல்லூரியில் கணக்கியல் பேராசிரியராக நியூட்டன் பொறுப்பேற்றார். அதன்பின் பிரசித்திப் பெற்ற ராயல் சொசைட்டியில் அவர் உறுப்பினராக சேர்த்துக்கொள்ளப்பட்டார்.

பட்டகம் எனப்படும் முக்கோணத்தில் ஒளி விழும்போது ஏற்படும் விளைவுகளை அவர் கண்டறிந்தார். ஒளியின் இமிசன் கோட்பாடு நியூட்டன் வகுத்து தந்ததுதான். வெகுதொலைவில் உள்ள ஓர் ஒளிரும் பொருளிலிருந்து வெளியாகும் துகள்கள் பரவெளியில் வினாடிக்கு நூற்றி தொன்னூராயிரம் மைல் வேகத்தில் விரைந்து வருவதுதான் ஒளியாக நமக்குத் தெரிகிறது என்பதுதான் அந்தக்கோட்பாடு. 

* எல்லாப் பொருள்களும் ஒன்றையொன்று ஈர்க்கும் தன்மையுடையன; அந்த ஈர்ப்பு விசை இரு பொருள்களுடைய நிறைகளின் பெருக்கலுக்கு நேர் விகிதத்திலும், அவ்விரு பொருள்களின் இடையே உள்ள தூரத்தின் வர்க்கத்திற்கு எதிர் விகிதத்திலும் இருக்கும்.

* ஒவ்வொரு வினைக்கும், அதற்கு எதிர்த் திசையிலிருந்து சமமான எதிர் வினை நிகழும்.

* ஒரு நிலையான பொருளை நகர்த்துவதற்கு, புற விசை இன்றியமையாதது.

'சர்' ஐசக் நியூட்டனின் மேற்கூறிய கோட்பாடுகளை அறியாத அறிவியல் மாணவர் எவரும் இருக்க முடியாது. அந்தளவுக்கு அறிவியலிலும், கணிதத்திலும் நியூட்டனின் பங்களிப்பு மகத்தானது. அறிவியல், கணிதம், இயந்திரவியல் துறைகளிலும், ஈர்ப்பு விசை பற்றியும் நியூட்டன் மேற்கொண்ட ஆய்வுகள் பெரிதும் போற்றப்பட்டன.

நியூட்டன் அறிவுச்செல்வத்தை சேர்த்து வைத்திருப்பதை உணர்ந்த அவரது நண்பர் ஹேய்லி அவற்றையெல்லாம் புத்தமாக வெளியிட நியூட்டனுக்கு ஊக்கமூட்டினார். அதன்பலனாக 1687 ஆம் ஆண்டு " Mathematical Principles of Natural Philosophy" என்ற புத்தகம் வெளியானது. "Principia" என்றும் அழைக்கப்பட்ட அந்த புத்தகம்தான் இதுவரை வெளியிடப்பட்டிருக்கும் அறிவியல் நூல்களிலேயே சிறந்ததாகக் கருதப்படுகிறது. 

1692 ஆம் ஆண்டு முதல் 1694 ஆம் ஆண்டு வரை இரண்டு ஆண்டுகள் நியூட்டன் கடுமையான நோய்வாய்ப்பட்டார். அவருக்கு நரம்பு சம்பந்தமான பிரச்சினையும், தூக்கமின்மை பிரச்சினையும் ஏற்பட்டது. நியூட்டனுக்கு புத்தி பேதலித்து விட்டதாக வதந்திகள் பரவின. ஆனால் பின்னர் நன்கு குணமடைந்து பல்கலைக்கழகப் பணிகளில் ஈடுபட்டார். 

1703 ஆம் ஆண்டில் நியூட்டன் ராயல் சொசைட்டியின் தலைவராகத் தேர்ந்தெடுக்கப்பட்டார். அடுத்த 25 ஆண்டுகள் அவர் ஒவ்வொரு ஆண்டுமே தலைவராகத் தேர்ந்தெடுக்கப்பட்டார் என்பது குறிப்பிடதக்கது. 1705 ஆம் ஆண்டு இங்கிலாந்தின் ராணி (Queen Anne) கேம்ஃப்ரிட்ஜ் பல்கலைக்கழகத்திற்கு வருகை மேற்கொண்டபோது நியூட்டனுக்கு 'சர்' பட்டம் வழங்கி சிறப்பித்தார். இங்கிலாந்தின் சிறந்த விஞ்ஞானியாக இன்றும் கருதப்படும் "சர் ஐசக் நியூட்டன்" நோய்வாய்ப்பட்டு 1727 ஆம் ஆண்டு மார்ச் 20 ஆம் தேதி இயற்கை எய்தினார். லண்டனில் புகழ்பெற்ற "Westminster Abbey"-யில் அடக்கம் செய்யப்பட்டார். மனு குலத்தின் மிகச் சிறந்த விலை மதிப்பில்லா மாணிக்கம் (The Best and Invaluable Gem of Mankind) என்று அவர் கல்லறையில் பொறிக்கப்பட்ட சொற்றொடர் ஆழ்ந்த பொருளுடையது.

நியூட்டனுக்கு பலர் அஞ்சலி செலுத்தினாலும் போப் எழுதிய அஞ்சலி மிக ஆழமானது... 

"இயற்கையும் அதன் விதிகளும் இருளில் கிடந்தன, கடவுள்... நியூட்டன் பிறக்கட்டும் என்றார் ஒளி பிறந்தது" 

இந்த வாசகம் நியூட்டன் பிறந்த அறையில் இன்றும் பொறிக்கப்பட்டிருக்கிறது! 

தெரியுமா இவரை - 5 அலெக்ஸாண்டர் ப்ளமிங்

பெனிசிலின் என்ற அற்புத மருந்தை உலகிற்கு தந்ததன் மூலம் மருத்துவ உலகின் தலையெழுத்தையே மாற்றி அமைத்தவர் அலெக்ஸாண்டர் ப்ளெமிங்.

1881 ஆம் ஆண்டு ஆகஸ்ட் 6-ம் தேதி ஸ்காட்லந்தில் லாக்ஃபில் நகரில்  விவசாய குடும்பத்தில் அலெக்ஸாண்டர் ப்ளமிங் பிறந்தார். ஆரம்பக் கல்வியை முடிந்த அவர், ஒரு நிறுவனத்தில் கணக்கராகச் சேர்ந்து 4 ஆண்டுகள் பணிபுரிந்தார். அதில், கொஞ்சம் பணத்தை சேர்த்த்து, தமது 20 வயதில்  லண்டனில் உள்ள புனித  மேரி மருத்துவ பள்ளியில் சேர்ந்து மருத்துவம் பயின்றார். 

டைபாய்டு காய்ச்சலுக்கு மருந்து கண்டுபிடித்த சர் ஆம்ராத் எட்வர்ட் ரைட் என்பவர் ப்ளெமிங்கிற்கு பேராசிரியராக இருந்தார். 1906 ஆம் ஆண்டு மருத்துவத்தில் சிறப்பு தேர்ச்சி பெற்று அந்த பேராரசிரியரிடமே உதவியாளராக சேர்ந்தார் ப்ளமிங். பின்னர், பாக்டீரியா கிருமிகளைப்பற்றி ஆய்வு மேற்கொண்ட அவர், முதல் உலகப்போரில்  இராணுவ மருத்துவ குழுவில் கேப்டனாக நியமிக்கப்பட்டார். அப்போது, போரில் காயமடைந்து, சரியான மருந்து இல்லாமல் மடிந்துபோன வீரர்களின் நிலை அவரை கலங்க வைத்தது.

அந்தக் காலக்கட்டத்தில் கார்பாலிக் அமிலம்தான் கிருமிக்கொல்லியாக பயன்படுத்தப்பட்டு வந்தது. ஆனால் அந்த அமிலம் கிருமிகளைக் கொன்றாலும், ரத்தத்தில் உள்ள வெள்ளை அணுக்களையும் அழித்தது. முதலாம் உலகப்போரில் சுமார் 70 லட்சம் வீரர்கள் காயமடைந்து உயிரிழந்தனர். அப்போது சிகிச்சைக்காக பயன்படுத்தப்பட்ட கார்பாலிக் அமிலம் உரிய பயனைத் தரவில்லை என்பதை ப்ளமிங்கும் அவரது பேராசிரியரும் உணர்ந்தனர். உலக போர் முடிந்த கையோடு மீண்டும் தன் ஆய்வுக்கூடத்திற்கு திரும்பினார் ப்ளெமிங். கிருமிகளை கொல்லும் மருந்துத்தை உருவாக்குவதற்காக பலவகை கிருமிகளை வளர்த்து அவற்றின் மீது சோதனை செய்தார் ப்ளெமிங். 

1928 ஆம் ஆண்டு லண்டனில் இலையுதிர் காலம் தொடங்கும் முன் இரண்டுவார விடுமுறைக்காக புறப்பட்டார் பிளமிங். அதற்கு முன் அவர்,  ஆய்வுக்கூட வட்டில், நிமோனியா உள்ளிட்ட நோய்களை உருவாக்கும்  ஸ்டெபிலோ காக்கஸ் என்ற கிருமியை சேமித்து வைத்துவிட்டு சென்றார். விடுமுறை முடிந்து வந்து பார்த்தபோது அந்த வட்டில் பூசனம் பூத்திருப்பதை பார்த்தார். அந்த பூசனம் படர்ந்திருந்த இடங்களில் கிருமிகள் கொல்லப்பட்டிருப்பதை அவர் கண்டறிந்தார். 

அந்த பூசனம் பெனிசிலியம் என்ற ஒருவித காளான் என்பது தெரிய வந்தது. அந்தக் காளானைக் கொண்டு பல்வேறு ஆய்வுகள் செய்தார் அதன் விளைவாக கிடைத்த அருமருந்துதான் பெனிசிலின். இரண்டாம் உலகப்போரின்போது அதிக அளவில் பெனிசிலின் உற்பத்தி செய்யப்பட்டு காயமடைந்த போர் வீரர்களுக்கு பயன்படுத்தப்பட்டது. அதன் பயனாக லட்சக் கணக்கான உயிர்கள் காக்கப்பட்டன. நோய் தொற்று அபாயம் ஏற்படுமே என்று அதுவரை அறுவை சிகிச்சை செய்ய தயங்கிய மருத்துவ உலகம் பெனிசிலின் வரவுக்கு பிறகு தைரியமாக அறுவை சிகிச்சைகளை மேற்கொண்டது.

பெனிசிலினுக்குப் பிறகு எத்தனையோ வேறுவித ஆன்டிபயாடிக் மருந்துகள் உற்பத்தி செய்யப்பட்டாலும், அவற்றுக்கு அஸ்திவாரம் போட்டது பெனிசிலின்தான். அந்த உயிர்காக்கும் கண்டுபிடிப்புக்காக 1945 ஆம் ஆண்டு மருத்துவத்துக்கான நோபல் பரிசை கொடுத்து  தனது நன்றியை தெரிவித்துக்கொண்டது உலகம்.

ஒரு மனிதனின் விடாமுயற்சியால் கடந்த ஒரு நூற்றாண்டில் மட்டும் எண்ணிலடங்கா உயிர்கள் காப்பாற்றப் பட்டிருக்கின்றன. விலைமதிக்க முடியாத மருந்தை உலகுக்கு தந்த ப்ளெமிங் 1955-ம் ஆண்டு மார்ச் 11-ம் தேதி லண்டனில் காலமானார். 

மேற்குத் தொடர்ச்சி மலை - சிறுகுறிப்பு

இமயமலையைவிட வயதில் மூத்தது, ஆறு மாநிலங்களை கடந்து, 1600 கி.மீ. தூரம் நீண்டு, அதிசயங்களையும், பொக்கிஷங்களையும் தன்னகத்தே வைத்துக் கொண்டு அமைதியாக இருக்கிறது மேற்கு தொடர்ச்சி மலை. 

அரிய வகை தாவரங்கள், அபூர்வ உயிரினங்கள், ஊட்டி, கொடைக்கானல், குற்றாலம் போன்ற கோடை வாசஸ்தலங்கள், சபரிமலை, பழநி ஆன்மீகத் தலங்கள் என ஏராளமான அம்சங்கள் மேற்குத் தொடர்ச்சி மலையில் உண்டு. இந்த பெருமைக்கு அங்கீகாரம் கொடுக்கும் வகையில், ஐ.நா.வின் யுனெஸ்கோ அமைப்பு, மேற்குத் தொடர்ச்சி மலையை பாரம்பா¤ய சின்னமாக அறிவித்துள்ளது.

குஜராத்தின் தாபி பள்ளத்தாக்கில் தொடங்கி மகாராஷ்டிரா, கோவா, கர்நாடகம்,  கேரளா, தமிழ்நாடு வழியாக இந்தியாவின் தென் கோடியான கன்னியாகுமரியில் முடிகிறது மேற்கு தொடர்ச்சி மலை. 6 மாநிலங்களை தாண்டி மொத்தம் ஆயிரத்து 600 கி.மீ. தூரம் நீண்டு 1 லட்சத்து 74 ஆயிரத்து 700 சதுர கிலோ மீட்டருக்கு பரந்து விரிந்துள்ளது. 

மகாராஷ்டிரா, கர்நாடகாவில் இது 'சாயத்ரி மலை' எனவும், தமிழகத்தில் பொதிகை மலை, ஆனைமலை, நீலகிரி மலை எனவும், கேரளாவில் மலபார் பகுதி, அகத்திய மலை எனவும் அழைக்கப்படுகிறது. இந்த மலையின் மிக உயரமான சிகரமாக கேரளாவில் உள்ள ஆனைமுடி விளங்குகிறது. 2 ஆயிரத்து 695 மீட்டர் உயரத்தில் உள்ள இதுதான் 

இந்த மலை 'கோண்டுவானா நிலப்பரப்பின் ஒரு பகுதி' என்கின்றனர் புவியியல் வரலாற்று அறிஞர்கள்.  பண்டைய காலத்தில் இந்த மலை தற்போதைய ஆப்ரிக்கா, மடகாஸ்கர், செஷல்ஸ் தீவுகளுடன் இணைந்திருந்தது. 15 கோடி ஆண்டுகளுக்கு முன்பு புவியியல் மாற்றம் ஏற்பட்டபோது கோண்டுவானா நிலப்பரப்பில் இருந்து பிரிந்த தென்னிந்திய பகுதிகள், ஆசிய கண்டம் நோக்கி இடம் பெயர்ந்தன. இதோடு 8 கோடி ஆண்டுகளுக்கு முன்பு தென்னிந்திய பகுதிகளில் ஏற்பட்ட எரிமலை வெடிப்பும் சேர்ந்து உருவான புவியியல் அமைப்பே மேற்கு தொடர்ச்சி மலை என வரலாற்று அறிஞர்கள் குறிப்பிடுகின்றனர்.

இத்தகைய தனித்துவம் வாய்ந்த புவியியல் அமைப்பு, காலப்போக்கில் அங்கு அரிய தாவரங்கள், உயிரினங்கள் உருவாக காரணமாக அமைந்தது. இங்குள்ள பல ஆயிரம் வயதுள்ள அடர்ந்த சோலை காடுகளை போன்று உலகில் வேறு எங்கும் காண முடியாது.

இந்த மலையில் உருவாகும் கோதாவரி, கிருஷ்ணா, காவிரி, தாமிரபரணி போன்ற பெரிய ஆறுகள் கிழக்கு நோக்கி பாய்ந்து வங்காள விரிகுடா கடலில் கலக்கின்றன.  பல்வேறு சிறிய ஆறுகள் மேற்கு நோக்கி பாய்ந்து அரபிக் கடலில் கலக்கின்றன. அதில் சிட்லாறு, பீமா ஆறு, மணிமுத்தாறு, கல்லாறு, பெண்ணாறு, பெரியாறு ஆகியவற்றின் குறுக்கே அணைகள் கட்டப்பட்டு, நீர் பாசனத்துக்கும் மின்சாரம் தயாரிக்கவும் பயன்படுத்தப்படுகிறது. மகாராஷ்டிராவில் உள்ள கோபாளி, கோய்னா, கர்நாடகாவில் உள்ள கிருஷ்ணசாகர், கேரளாவின் பரம்பிக்குளம், தமிழகத்தில் மேட்டூர் ஆகிய பெரிய அணைகள் முக்கியமானவை.

மேற்குத் தொடர்ச்சி மலையில் யானைகள் எண்ணிக்கை அதிகளவில் உள்ளது. புலி, சிறுத்தை, கருஞ்சிறுத்தை, கரடி, மிளா போன்ற மிருகங்கள், மான், சோலை மந்தி, சிங்கவால் குரங்கு, வரையாடு உள்ளிட்ட 139 வகையான பாலூட்டி இனங்கள், 508 வகை பறவைகள், நிலத்திலும் நீரிலும் வாழும் 176 வகை உயிரினங்கள் உள்ளன. இவற்றில் 119 வகை பட்டாம்பூச்சிகள், பறக்கும் அணில், பறவை கீரி போன்ற அரிய உயிரினங்களும் அடங்கும்.

இந்த மலையில் தேக்கு மரக்காடுகள் அதிகம் உள்ளன. தேக்கடி சிறந்த சுற்றுலா தலமாக திகழ்கிறது. 5 ஆயிரத்துக்கும் மேற்பட்ட தாவரங்களில் பூக்கும் மலர்கள், மலையின் அழகை ரம்மியமாக்குகிறது. தேயிலை தோட்டங்கள், காபி தோட்டங்கள், ஏலக்காய், மிளகு போன்ற பணப் பயிர்கள் விளைகின்றன. 

அரபிக் கடலிருந்து வீசும் குளிர்ந்த காற்று, மேற்கு தொடர்ச்சி மலையில் மோதி மழை தருகிறது. இதுதான் தென்மேற்கு பருவ மழையாகும். இந்தியாவின் 40 சதவீத நீர்த் தேவையை பூர்த்தி செய்வது மேற்குத் தொடர்ச்சி மலை. தென்னிந்தியாவின் நீர் ஆதாரமே இந்த மலைதான். 

பத்ரா, பீமா, சாலக்குடி, சித்தாறு, கோதாவரி, கபினி, காளி, கல்லாயி, காவிரி, கோய்னா, கிருஷ்ணா, குண்டலி, மகாபலேஷ்வர், மலபிரபா, மணிமுத்தாறு, நேத்ராவதி, பச்சையாறு, பரம்பிக்குளம், வைகை, பெண்ணாறு, சரஸ்வதி, சாவித்ரி, ஷராவதி, தாமிரபரணி, தபதி, துங்கா, வீணா ஆகியவை மேற்குத் தொடரச்சி மலையில் உற்பத்தியாகும் ஆறுகள். 

குற்றாலம், அகஸ்தியர், சுருளி, அப்பே, சுஞ்சனா சுட்டே, சோகக், சாலக்குடி, கல்கட்டி, உஞ்சள்ளி, பாணதீர்த்தம், சத்தோடு, சிவசமுத்திரம் நீர் வீழ்ச்சி என இந்த மலை தொடர்ச்சியில் உள்ள அருவிகளின் பட்டியல் நீளமானது. கோவா, பாலக்காடு போன்ற கணவாய்களும் இதில் அடக்கம். 

சபரிமலை ஐயப்பன் கோயில், பழநி மலை முருகன் கோயில், கற்புக்கரசி கண்ணகி கோயில் போன்ற ஆன்மீகத் தலங்களும் இந்த மலைத்தொடரில் அமைந்துள்ளன. மலைகளின் அரசியான உதகை, மலைகளின் இளவரசி எனப்படும் கொடைக்கானல், ஏழைகளின் உதகை எனப்படும் ஏற்காடு போன்ற கோடை வாசஸ்தலங்களும், சுற்றுலா பயணிகளை கவரும் தேக்கடியும் இதில் அமைந்துள்ளன.

களக்காடு முண்டந்துறை, பிடிஆர் புலிகள் காப்பகம், முதுமலை புலிகள் காப்பகம், அகத்தியமலை, நீலகிரி உயிர்க்கோள காப்பகம் மற்றும் இந்திரா காந்தி தேசிய பூங்கா, பந்திப்பூர் உள்ளிட்ட பல தேசிய பூங்காக்களும் ஸ்ரீவில்லிபுத்தூர், தலைக்காவிரி, வயநாடு உள்ளிட்ட ஏராளமான இடங்களில் காட்டுயிர் வாழ்விடங்கள் மற்றும் பறவைகள் வாழ்விடங்களும் அமைந்துள்ளன.

அமேசான் காடுகள், கிழக்கு இமயமலை உட்பட உலகின் பல்லுயிர் வளர்ச்சியை ஊக்குவிக்கும் 18 காடுகளுள் மேற்குத் தொடர்ச்சி மலைக்குத் தான் முதலிடம். 1,00,080 சதுர கி.மீ. பரப்பளவுக்குள் விரிந்து கிடக்கும் மேற்குத் தொடர்ச்சி மலைக் காடுகள், இந்திய நிலப்பரப்பில் ஆறு சதவீதம். இந்தியாவின் 30 சதவீத வன உயிரினங்கள், 14 தேசிய பூங்காக்கள், 44 வன உயிரினச் சரணாலயங்கள் மேற்கு மலைத் தொடர்ச்சிக்குள் அடக்கம். 

தெரியுமா இவரை - 4 மார்க்கோனி

வானொலியையும், கம்பியில்லாத் தந்தி முறையையும் உலகுக்குத் தந்தவர் மார்கோனி. 'வானொலியின் தந்தை' என போற்றப்படும் அவர் 1874-ம் ஆண்டு ஏப்ரல் 25-ஆம் தேதி இத்தாலியின் பொலொனா நகரில் பிறந்தார். அவரது இயற்பெயர் குலீல்மோ மார்க்கோனி. 

தந்தை தனவந்தர். எனவே மார்க்கோனிக்கு மிகச்சிறந்த கல்வி கிடைத்தது. வீட்டிலேயே தந்தை உருவாக்கி வைத்திருந்த நூலகம், அவா¤ன் பார்வையை விசாலப்படுத்தின. சிறு வயதிலேயே மார்கோனிக்கு மின்சக்தி ஆய்விலும், இயற்பியலிலும் ஆர்வம் தொற்றிக் கொண்டது. எனவே வீட்டுப் பரணில் சிறு ஆய்வுக் கூடத்தை நிறுவி ஆய்வுகளை மேற்கொண்டார். 

தமது 20-ம் வயதில், கம்பியில்லாமல் ஒலி அலைகளை அனுப்பும் ஆய்வு குறித்து படிக்கும் வாய்ப்பு அவருக்கு அமைந்தது. அது அவருக்கு உந்துதலாக இருக்கவே, அதைப்பற்றி தொடர்ந்து  ஆய்வுகள் மேற்கொண்டார். அதன் பயனாக, ஓராண்டிலேயே கம்பியில்லாமல் தந்தியை அதாவது டெலிகிராப் அனுப்பும் முறையை உருவாக்கினார். 

அவரது கண்டுபிடிப்பின் முக்கியத்துவத்தை இத்தாலி அரசாங்கம் உணராததால் தாயின் அறிவுரை கேட்டு 1896-ஆம் ஆண்டு லண்டனுக்கு வந்தார் மார்க்கோனி. இங்கிலாந்தின் பிரிட்டிஷ் அஞ்சல் துறை அவரது கண்டுபிடிப்பை வரவேற்று அறிமுகம் செய்தது. அதே ஆண்டு தனது கண்டுபிடிப்பான கம்பியில்லா தந்தி முறைக்கு காப்புரிமம் பெற்றார் மார்க்கோனி.

ஒலி அலைகளை வானில் உலா வரச்செய்ய முடியும் என்று நம்பிய மார்க்கோனி அதனை சோதித்துப் பார்க்க, பலூன்களையும், பட்டங்களையும் பறக்க விட்டு அவற்றிலிருந்து சமிக்ஞைகளை பெற முடியுமா என்று சோதித்தார். அதில் வெற்றி கிடைக்க, பிரிட்டிஷ் கால்வாய்க்கு அருகில் ஒன்பது மைல் சுற்று வட்டாரத்தில் செய்தி அலைகளை வெற்றிகரமாக அனுப்பியும், பெற்றும் காட்டினார். 

1899-ஆம் ஆண்டு பிரான்ஸில் ஒன்றும், இங்கிலாந்தில் ஒன்றுமாக இரண்டு கம்பியில்லா தொலைத் தொடர்பு நிலையங்களை உருவாக்கினார் மார்கோனி. 31 மைல் இடைவெளி இருந்த இரண்டுக்குமிடையே ஆங்கில கால்வாய்க்கும் மேலே வெற்றிகரமாக தகவல் பரிமாற்றத்தை செய்து காட்டினார். அவர் உருவாக்கிய கருவிகள் போர்க்கப்பல்களில் பயன்படுத்தப்பட்டன. அதன் மூலம் 75 மைல் சுற்றளவில் செய்தி பரிவர்த்தனை செய்து கொள்ள முடிந்தது. 

1901-ம் ஆண்டு டிசம்பர் 12-ம் தேதி ஓர் அபூர்வமான உண்மையை நிரூபித்துக்காட்டினார் மார்க்கோனி. உலகம் உருண்டை என்பதால், வானொலி அலைகள் 200 கிலோ மீட்டர் வரைதான் பயணிக்கும் என்று அப்போது நம்பப்பட்டது. உலகின் உருண்டை வடிவத்திற்கும் வானொலி அலைகளின் பயணத்திற்கும் தொடர்பு இல்லை என்று நம்பிய மார்க்கோனி, அன்றைய தினம் செயிண்ட் ஜான்ஸ் தீவில் உள்ள ஆய்வுக்கூடத்தில் அமர்ந்து கொண்டு ஹெட்போன் கருவியை அணிந்து கொண்டு ஆய்வு மேற்கொண்டிருந்தார். 2100 மைல் தொலைவுக்கு அப்பால் இங்கிலாந்தின் கார்ன்வால் பகுதியிலிருந்து அவருக்கு மாஸ்கோட் மூலம் சமிக்ஞைகள் அனுப்பப்பட்டன.

தந்தி இல்லாமலேயே காற்றில் உலா வந்த அந்த சமிக்ஞைகள் அட்லாண்டிக் பெருங்கடலைத் தாண்டி மார்க்கோனியின் காதுகளில் ஒலித்தன. உலகின் ஒரு பகுதியிலிருந்து மறு பகுதிக்கு ரேடியோ மூலம் செய்திகளை அனுப்ப முடியும் என்பதை அந்த சோதனை மூலம் நிரூபித்துக் காட்டினார் மார்க்கோனி. மூன்று ஆண்டுகள் கழித்து அமெரிக்காவுக்கும், இங்கிலாந்துக்கும் இடையே கம்பியில்லா தந்தி முறையை நிறுவிக் கொடுத்தார். அதுவரை தந்தியில்லா கருத்து பரிமாற்றம் எல்லாம் மாஸ்கோட் எனப்படும் குறியீட்டு முறையில் இருந்தன. அதே அடிப்படையில் மனித குரலையும் அனுப்ப முடியும் என்று நம்பிய மார்க்கோனி 1915-ஆம் ஆண்டு அதற்கான முயற்சியில் ஈடுபட்டார்.

ஐந்து ஆண்டு முயற்சிக்குப் பிறகு 1920-ஆண்டின் தொடக்கத்தில் நண்பர்கள் சிலரை தாம் தங்கியிருந்த படகு இல்லத்திற்கு வரவழைத்து இசை விருந்தளித்தார். அந்த இசை நிகழ்ச்சி வானொலி வழியே லண்டன் மாநகரில் ஒலிப்பரப்பபட்டது. வானொலியும் பிறந்தது. தொடர்ந்து அவர் செய்த ஆய்வின் காரணமாக 1922-ஆம் ஆண்டு பிப்ரவரி 14-ஆம் நாள் இங்கிலாந்து வானொலி நிலையம் செயல்படத் தொடங்கியது. ஒலி அலைகளைப் பரப்புவதில் மகத்தான சாதனை புரிந்த மார்க்கோனிக்கு 1909-ஆம் ஆண்டு இயற்பியலுக்கான நோபல் பரிசு வழங்கப்பட்டது. 

வானொலி என்ற சக்தி வாய்ந்த ஊடகத்தை உலகுக்குத் தந்த மார்க்கோனி 1937-ம் ஆண்டு ஜூலை 20-ம் நாள் தமது 63-ம் வயதில் ரோம் நகரில் காலமானார்.